小谷為老公劉穎恆（小圖）剖腹誕下肥嘟嘟成日笑嘅劉心。
34歲嘅谷祖琳（小谷）上月20號喺養和醫院開刀生咗個女，經個幾星期休息，噚日公告母女平安，小谷透露囡囡改咗名叫劉心，重7.3磅，佢向各傳媒派發特製嘅心形曲奇，希望大家同囡囡劉心一樣，天天開心咁話。
今次係小谷頭一胎，老公劉穎恆（Andrew）一直喺產房陪伴，聽到BB響亮喊聲時，佢哋都感動到喊。Andrew幫囡囡改名做劉心，小谷話希望囡囡將來用真心待人處事，天天都開心快樂。原來，劉心個名讀音同陳慧琳個細仔小龍包劉琛同音，劉琛、劉心、留心，小谷會唔會幫囡囡改英文名做Attention呢？
劉心使出一招O嘴，小谷當然冧晒。
小谷特製心形曲奇，代囡囡向大家送上開心祝福。
劉心真係人如其名，笑到單晒眼好開心。
初為人母手腳亂劉心個面珠仔脹卜卜成日笑，唔止得意可能仲係富貴命，小谷同囡囡出院嗰日撞正強颱風襲港，返屋企嗰陣掛八號風球，真係貴人出門招風雨。小谷開始學湊女時有啲手忙腳亂，所以選擇餵奶粉，家小谷漸漸上手冇難度啦！
