法籍名模Amanda S.舊年攞晒成副身家，斥資300萬喺中環IFC開法式餅店petites Amanda。為盤生意，佢都少咗行騷，日日返舖頭親力親為sell客收銀，成個人瘦晒，可想而知幾大壓力！
不過唔知係咪Amanda S.舖頭嘅食材太矜貴，舊年12月有女餅師出「三隻手」，偷材料同曲奇，最後俾佢炒咗！但有啲嘢真係禍不單行。星期三（25日）下午約三點幾，又有賊仔打Amanda S.個收銀機主意，不過俾佢及時發現喝住，賊人先落荒而逃。呢位靚女老闆即刻報警，媽咪姐聽到佢同警察叔叔講：「我睇住佢伸隻手入去，跟住我就大嗌！」隨即攞出iPad俾警察睇片，原來店內CCTV拍到賊人面目，咁就可以早啲破案啦！嬲到黑晒面嘅Amanda S.後尾同媽咪姐講：「我冇事，好小事啫，冇損失，放心。」名模即係名模，果然處變不驚，叻女呀！
壓力令Amanda S.日漸纖瘦，但佢向警員揮拳示範點喝走賊人時，好有power㗎。
Amanda S.一邊同警員翻睇CCTV捉賊，一邊繼續開門做生意，揾錢最緊要！
