Shanghai Tang X Wang Peiyi圖案褸、黑褲
時裝騷天橋又直又平，混血名模Amanda Strang瀟灑地走過無數次，人生道路卻往往崎嶇。去年突然宣佈與相處十一年的老公離婚，前夫火速搭上新女友，Amanda也激咀外籍男，似乎有新戀情。Amanda這一年來堅強面對失婚，將全副精神投放於生意及運動上，最近更賣走心血餅店的部份股份，決心尋回久別的正常生活節奏，重新追逐完美人生。
統籌：林妙萍
撰文：林嘉慈
攝影：周樂恆
Amanda S.於2011年與拍拖9年的意籍金融才俊Christian Cappelli結束愛情長跑，男方特選定情的中環Kee Club同一張枱註冊結婚，好不浪漫。兩人恩愛出入兼計劃生兒育女，去年7月，Amanda S.忽然以性格不合及生活理念出現分歧為由，宣佈離婚。離婚不夠一年，Amanda S.在四月中楊其龍囡囡百日宴和前夫同場，前夫戲劇性地拖着陀八個月巨肚的新歡，Amanda S.則與同行的6呎外籍男肉緊舌戰，各自各精采。
Amanda封口不講感情事。
Amanda與Christian當年在定情的餐廳註冊結婚，並切蛋糕慶祝。
感情事待適應
久未接受專訪的Amanda S.，日前為《add》拍照時狀態大勇，甫士多多，一個多小時已完成拍攝部份，惟獨未準備好回應私人事，絕口不提感情狀況，看來情傷非淺。問生意女強人是否剛強地對待男士？她才以短句回應：「Not really（並不是）。」隨即落閘：「我想只是適應環境，做生意與私下生活是兩回事。」餅店與運動是失婚Amanda S.的精神寄託，加上離港散心，離婚後兩個月，走出分手陰霾，重回幕前。餅店方面，一月底結束銅鑼灣分店後，現時專注打理中環ifc總店，「真係好忙、好忙，成個生意真係嘥咗好多時間，因為呢一年來都冇一個大廚，所以我就要自己睇住好多廚房嘅嘢，所以就少啲機會喺舖頭，除此之外，我冇一個好大嘅團隊，好多都要自己去做。」
Amanda逐漸放開困身的生意，歐遊尋找自己的生活。
一星期運動多次，Amanda練成結實馬甲線。
運動是Amanda離婚後的發洩情緒好方法。
賣餅店尋生活
直至兩個月前，Amanda S.作出重大轉變，決定賣走餅店的部份股份：「有個新投資者，佢哋睇住日常運作，睇住蛋糕幾點出發、定單，我就專注睇品質。」現時升格為餅店顧問，賣股份不是純粹為錢，「之前成個生意自己做，我真係犧牲咗我嘅生活，日日都喺嗰度，日日都要做，乜都係自己做，I had no life，I want my life back a little bit（我沒有生活，想拾回少許自己的生活）。」現正逐步回復正常的生活步伐，「慢慢嚟，我開始瞓多啲，飛返法國睇屋企人，開始趕上所有事。」
狂操練馬甲線
尋找新生活的同時，Amanda以蜜糖膚色新形象示人，「我喜歡運動，所以冇辦法啦，好鍾意游水，香港太陽又好猛，所以曬黑咗少少，我太愛游泳。」更多時間留守健身房，最近轉了曾教七人欖球隊的新教練，幾乎每朝6、7點就起床狂操，練成老鼠仔、馬甲線的超健康身形，「我不是25歲，不是18歲，當然我真係好努力咁去做運動，加埋我又咁鍾意食嘢，如果我唔做運動，我肯定會係一個大肥妹，哈哈。」
一星期至少運動三次，最多五、六次，視乎忙碌程度，還配合飲食，「冇捷徑，一定要做運動，睇住點樣去食嘢，冇可能食好多、好肥嘅嘢，做運動就會瘦，好難。」育成鋼條身形餐單又是甚麼？「我食我想食嘅嘢，如果我今日起身想食麵包就麵包，牛扒就牛扒，我聽身體指使，可能會食好多好多。」任性之餘，又有節制的時候，要控制份量。
Shanghai Tang X Masha Ma雙色裙
Shanghai Tang X Wang Peiyi蝴蝶圖案裝
Shanghai Tang X Masha Ma白背心、黑褲
【鬼妹愛中國服】
混血Amanda這次穿進軍國際的內地設計師Masha Ma及王培沂為上海灘設計的別注系列，真正示範中西合璧：「我係一半鬼妹，一半台灣人，中西合璧係平常事，喺台灣屋企過新年都會着紅衫，由細至大都睇到好多east meets west。」如何配搭可突破中國風服裝的傳統框架？「睇衫嘅風格、質地、形狀，其實好易，可以配牛仔褲，或者一件靚嘅唐裝衫，攝去裙入面，可以有好多變化。」
更多精采時尚內容，盡在http://add.appledaily.com。
from:
http://hk.apple.nextmedia ... 150521/19154517
