容祖兒同劉浩龍早前搞出勁高調嘅「祖師戀」，點知外界唔多接受，造成反效果。近日兩人不約而同放晒啲「工作相」上微博，一心淡化戀情。
祖兒宣傳國語新碟，去完北京又去台灣。「大明星」劉浩龍呢期留晒鬚拍王維基電視劇《第二人生》，周一(23日)三號風球都照拍外景，無非想大家知佢有幾勤力啫。嘩！咁上進睇嚟好快上位做一線小生，到時咪唔使再俾人話女尊男卑囉！
台灣食麻辣
祖兒未出發去台灣，已急不及待食碗麻辣米線，不過張相只係影住一碗米線，祖兒唔係食自己咁寂寞嘛？
猛男傍身
祖兒冇師兄在旁，都唔憂身邊冇猛男陪伴。呢班黑超工作人員都好型仔喎！難怪有網友忍唔住話是但搵個都有型過劉浩龍啦！
三號波開工
劉浩龍上月高調承認同祖兒拍拖，今次又高調地話俾大家知佢三號風球下都要開工。好可惜咁勤力，都博唔到網友讚佢一句。
打好關係
劉浩龍準備投身電視圈做小生，雖然仲未上位做到主角，但見佢同劇中父親郭峰合照相嚟睇，師兄同劇中演員關係都唔錯喎！
網友插爆毒龍
自從「祖師戀」戀情曝光後，劉浩龍形象插水，被指靠祖兒上位兼扮大牌，仲俾人冠以「劉毒龍」惡名。劉浩龍每次上載相片到微博，都惹來網友留言圍插。
奶嘅諸葛紫岐，除咗努力同老公薛嘉麟造人之外，近排仲做埋賢內助，幫老公Neway旗下歌手做形象指導。媽咪姐八到呢個係薛老太嘅意思，佢見呢位新抱鍾意扮靚，不如將興趣變成工作，幫老公手搞好盤生意啦！上星期媽咪姐行經尖沙嘴圓方，就見到佢帶住HotCha兩個妹行街飲茶兼揀戰衣。
其間諸葛紫岐同Crystal（張紋嘉）密密斟勁多偈傾，坐對面嘅Winkie（黎美言）就埋唔到堆戇居居，真陰功。行街時兩位妹又爭住上前討老闆娘歡心，一人繑實一邊，三人行邊講邊笑去Zara揀衫。咁人係好現實嘅，諸葛紫岐同老公薛嘉麟依家得天下，HotCha當然碼實啦！唔通走去黐失寵大少奶陳法拉咩。
繑實三人行
HotCha同諸葛紫岐行街都繑到實一實，究竟真係感情好到咁，抑或兩女爭寵爭出面呢？
HotCha由諸葛紫岐帶領下殺入Zara時裝店，老闆娘主攻成熟打扮裝束，兩女就睇番啲青春無敵夏天裝，不過最終全部都係混吉。
三個人喺圓方嘆茶食cake半個鐘，見Crystal同老闆娘傾到興起，竟然做出呢個叫人收聲嘅手勢，咁大膽？
