拍拖八年，去年當住全港電視觀眾在熒幕上公開承認戀情的黃宗澤、胡杏兒，以為打風打唔甩，下一步順理成章結婚生仔，點知，突然分手！
據了解，黃宗澤同胡杏兒拍拖多年，一直死性不改，經常背住女友搞搞震。今年初，黃宗澤趁胡杏兒留守內地拍劇半年，無人管住阻頭阻勢，越玩越出位，連環搞女，欲罷不能。
胡杏兒忍無可忍，雙方炒大鑊，最終在個半月前，正式攤牌，八年情決裂。本週二（七月二十四日），胡杏兒親口承認，已同黃宗澤分手：「佢（黃宗澤）嘅嘢已經同我無關！」
上海啜女
黃宗澤在上海拍劇遇着出名姣兼有34E的柳岩，戲中仲有大量嘴戲，「姣婆遇着脂粉客」，兩話咁易搞上。
8號波柳岩
半年無王管
從去年十二月尾開始，至今年六月，胡杏兒連接在內地拍了《金玉滿堂》及《辣媽俏爸》兩劇，同男友黃宗澤分隔兩地足有半年。蒲得劈得更加「食」得的黃宗澤，有如甩繩馬騮，在這段時間無王管，過足癮！
二月初，他先被發現鬼祟與朋友在蘭桂坊喪劈，其間有索女埋身，黃宗澤來者不拒，攬住咬耳仔，完全將胡杏兒拋諸腦後。
事件被揭發，胡杏兒即使再不滿，但對外依然為男友講好說話，「我一向都冇管佢，佢鍾意做乜都得，同埋做呢行最緊要受歡迎，有人緣係好事。」之後的情人節，黃宗澤親自下廚補鑊，氹番女友。
「Bosco明知杏兒易氹，每次出事，佢講幾句就搞掂，因為覺得自己食硬對方，咪越玩越過分囉。」黃宗澤身邊人說。
無晒心機
上週六，胡杏兒與馬國明為新劇《戀愛季節》拍外景，等埋位時，胡杏兒眉頭深鎖。
見到胡杏兒悶悶不樂，馬國明講笑話氹對方開心。
胡杏兒離港半年，拍了《辣媽俏爸》（左）及《金玉滿堂》（右）兩部大陸劇，賺到人仔，但冇咗條仔。
用三部手機
不過，黃宗澤並無因為斷正一次而收歛，女友離港返內地繼續開工，他就繼續放肆；不過也有學精，避免出現如蘭桂坊這類「易揚」熱點，轉到尖沙咀、銅鑼灣私竇玩，有時甚至玩到連女友都搵佢唔到。
「Bosco鍾意飲酒，一飲就唔識停，去私竇玩安全啲，冇咁易俾傳媒影到，加上私竇啲女有晒來路，唔似外面咁雜唔知邊個打邊個，冇咁易惹麻煩。有次佢同不知名嘅模一齊玩失蹤，但大家都知個女仔係錢國偉帶嚟，就算有事好易搞掂。
「仲有，Bosco好識玩，啲女仔出嚟玩幾次就唔再搵人，減少上身機會，佢仲一個人用三部電話，一部係杏兒同屋企人，一部做嘢，另一部就成日轉號碼，方便溝女兼避女，絕對係慣匪招。」黃宗澤身邊人說。
氹得就氹
04年，黃宗澤拍《我的野蠻奶奶》時，日日做「柴可夫」接送胡杏兒，成功得手！拍拖八年，二人關係浮面，接近談婚論嫁地步。有指女友管得嚴，但多年來Bosco不斷對其他異性扮「歡樂先生」，氹女手法有一套。
06年，有指Bosco與唐詩詠合作《最美麗的第七天》，埋位「抽水」，捉實對方雙手，又胸頂對方。拍淋雨戲時，又向對方送上愛心薑茶，冧女冇手軟。
07年拍《溏心風暴》，二人在片場對稿時大講鹹濕笑話，被電到暈陀陀的Bosco更做埋柴可夫，收工送對方返屋企
08年到多倫多擔任華裔小姐嘉賓，Bosco中華姐倪晨曦，主動狂讚對方靚女攞電話，女方的fb亦有二人的親密照。
09年與Toby合作《摘星之旅》扮夫妻，在深圳拍外景時，有指二人私下以老公老婆相稱，又有劇組人員踢爆二人經常齊齊「玩失蹤」。
女助手
胡杏兒去年情侶檔在內地拍劇集《跑馬場》期間，趁女友返港工作，同女助手陳小琳不時在微博傳情，女方更稱他「波波哥」。
搭上大乳牛
一齊八年，胡杏兒當然熟知對方性格，對男友「食」到不知所終，鞭長莫及的她，唯有隔空長途電話開拖。
兩人陷入冷戰關係，六月初胡杏兒拍完劇返香港，又輪到黃宗澤起程到上海拍《麵包樹上的女人》，二人根本無機會當面好好講清楚。
在上海期間，黃宗澤快手搞掂擁有34E波霸身材大陸女演員柳岩。由於二人在戲中有多場親熱咀戲，咀到約埋一齊蒲，攬埋一嚿跳舞，態度親暱程度，旁人一看便知有景轟，事件傳遍整個劇組，有認識胡杏兒的劇組人員就睇唔過眼報串。
半年內連番偷食，胡杏兒終於心死，今年六月中，決定同黃宗澤斬纜。
「佢兩個唔係第一次分手，○九年Bosco同Toby（梁靖琪）拍劇搞埋，杏兒已經同佢分手，但Bosco氹佢話唔會有下次，杏兒心軟信佢話俾多一次機會，點知佢係一次又一次，杏兒好失望，就算幾唔捨得呢八年感情，都要分手，因為唔知仲要傷多幾多次。」胡杏兒身邊人說。
黃宗澤向外稱因為整唔見胡杏兒所送的十萬元鑽石耳環，為了賠罪，送了部價值九十幾萬的Benz給對方，但原來他只付了車價一成（九萬多元）首期
近日胡杏兒開工都冇揸Benz，改坐自己買的七人車。
今年一月黃宗澤母親六十歲生日，胡杏兒以「新抱仔」身份幫黃母搞大壽。
二人仍同住在火炭晉名峰隔籬單位，但胡杏兒會趁黃宗澤回港前盡快搬走。
九月搬走
目前，胡杏兒與黃宗澤仍同住在火炭晉名峰同層相鄰單位，但據知她已積極搵樓搬，黃宗澤九月拍完《麵》劇返港前，搬出愛巢，一刀兩斷。
人唔想見，車都一樣！大半年前，黃宗澤自爆送九十萬Benz SLK350賀女友做視后，近日不再見胡杏兒出動「愛的禮物」開工，改用舊有的七人車。
「外面啲人以為架車係Bosco俾晒錢，但佢同啲friend都講過，淨係俾咗九萬幾蚊首期，其餘都係杏兒自己供番！」知情者說。
上星期五，黃宗澤在上海拍外景，在休息時間，與女主角唐嫣分別使開助手，一齊上車休息。
去年胡杏兒攞視后時，公開愛的宣言，表示男友難頂，但都希望大家可以繼續頂落去，但結果她都頂唔順黃宗澤爛滾。
無女不歡的黃宗澤，早前相約到上海出席活動的周麗淇一齊食飯。
之前已傳過黃宗澤偷嗒女助手，今次返大陸拍劇，他繼續用對方，收工後仍不時一齊shopping。
發夢變筍盤
胡杏兒不再糾纏八年情，黃宗澤樂得繼續風流快活，另一方面亦鋪定後路，夢想宣布分手後，自己可以好似陳豪俾廖碧兒飛完變筍盤。
為做好準備做「筍盤」，黃宗澤一反常態，每次接受傳媒訪問，都刻意主動提「女友」胡杏兒，讚到對方天上有，扮晒情聖，《護花危情》許sir上身。
「Bosco以前又呃女又醉酒鬧事，個底根本花晒，因為同咗杏兒一齊，先令人改觀；所以佢都有啲擔心分手之後，會打回原形，所以呢排盡量打定底，扮晒專一好男人囉！」黃宗澤身邊人說。
被問到有關分手一事，胡杏兒相當愕然，更被助手煞有介事地拉入錄影廠。
週二，胡杏兒在《衝2》記者會上扮無嘢，與其他演員有講有笑。
去年公布《衝2》時，無綫原本安排黃、胡情侶檔演出。
親認分手
本週二（二十四日），胡杏兒出席《衝上雲霄Ⅱ》開鏡拜神記者會，繼續死撐扮若無其事，與其他演員有講有笑。記者表明來意，問她與黃宗澤分手一事，她即變臉。
壹：你同Bosco係咪分咗手個半月呀？
胡：（面色一沉）吓……咩呀，你哋喺邊度聽返嚟？
壹：有消息話Bosco喺上海衰偷食，所以你哋分手。
胡：（停止數秒）唔……你哋唔好問我喇，佢（黃宗澤）嘅嘢……其實已經同我無關係，我冇嘢答到你。
其間胡杏兒助手數度叫埋位阻止記者，之後索性拉她入廠，經後門走人。胡杏兒表明立場與黃宗澤劃清界線，看來兩人感情已破裂無得掹。
兩人在微博上最後一次交流是在今年的情人節，之後二人進入冷戰期，再沒有互動。
爛尾
拍戲拍劇，男女主角日對夜對，話咁易撻着，但大部分「熒幕情侶」都分手收場，劉嘉玲梁朝偉、苗僑偉戚美珍修成正果的例子，極罕！
馬國明、胡定欣
08年一齊出戰湖南衞視《舞動奇跡2》撻着，拍拖近三年，原本同家人同住的胡定欣，為爭取與男友相處機會，搬到太古城同區一齊住，但馬國明最終頂唔順女友「公主病」而分手。
陳豪、廖碧兒
拍拖六年，經常情侶檔拍住搵錢。其間廖碧兒多次被撞破偷食，到10年尾，再被踢爆搭上林忠豪，揸對方淺水灣道獨立屋鎖匙過夜，騎牛搵馬的廖碧兒，孤注一擲小小超表弟，六年情玩完。
吳卓羲、張馨予
返內地拍劇《大丫鬟》搭上35F張馨予，女方每次來港，必在男友帝庭園寓所留宿，吳卓羲亦高調確認對方女友身份，近日卻傳出張馨予改吼內地男星李晨。
佘詩曼、鄭嘉穎
08年，鄭嘉穎背住女友周麗淇暗交佘詩曼，拍拖一年，小男人病常發的鄭嘉穎，當時因為搵錢能力不及女友，雙方多次發生拗撬，阿佘忍唔住分手。
怕變賤男
黃宗澤表示對女友已落訂，但林峯開口中說：「落咗訂都可以撻訂。」
拍拖8年，黃宗澤對胡杏兒的事，一直避忌，拍拖初期甚至唔肯確認對方女友身份。但近月卻一反常態，開口埋口提及女友，又話計劃三年後結婚，鋪路保住「好男人」形象。
29/4接受內地傳媒訪問，被問到婚事，Bosco表示：「不擔心結婚會影響事業！但你要問問胡杏兒願不願意。」
5/5出席鄧智偉《平行回憶音樂會》爆自己正努力搵錢買樓，籌備人生大事：「我賺夠錢買到夢想物業便結婚，應該三年吧！」記者追問有否買定求婚戒指，他得戚說：「你又知我冇買過鑽石？不過幾多卡就唔講！」
12/6被指在內地身價暴升，Bosco刻意將酬勞拉到女友身上：「都係想儲厚啲老婆本！不過而家要結都唔係唔夠嘅！」
20/7為劇集《麵包樹上的人》宣傳，接受內地傳媒訪問，被問到跟哪位女演員最有默契，又主動提及女友：「胡杏兒應該是最好的！」
