Beyond成員黃貫中七月初於紅館舉行兩場「Paul Wong Rockestra演唱會」後，就報導篇幅及入座率向傳媒開拖，又於微博發爛渣，轉發報館記者、編輯姓名電話及相片，惹得大批fans致電對方，粗口辱罵，出言恐嚇。滿城風雨，好兄弟黃家強在微博勸交，反被Paul迷狂炸，鬧他「狗屎強」、「靠紀念家駒搵飯食」、「出賣兄弟」。
勸交出事，遠在吉林的葉世榮，也在微博被插「為什麼不為兄弟說一句話？」講又鬧，唔講又鬧，阿Paul累街坊！
○五年Beyond最後一次重組演唱會，當時阿Paul與家強在台上針鋒相對，慶功宴時更加面左左。
○九年在紅館開過演唱會後，黃家強與阿Paul一度破冰，Beyond三子重修舊好，不時在微博互相關注。將為人父的阿Paul，月初做演唱會前，還同阿榮講電話傾湊女經，當晚有記者問他是否見有空櫈，他還大方說：「可能燈光太勁，睇唔到。」
第二日做完尾場，在慶功宴接受訪問時，阿Paul突然好激動，聲稱自己全場爆滿卻被屈得七成入座率，又投訴報導篇幅細，三十年彈到手指起水泡，都無人理……怒火一發不可收拾。
上週一（十六日）晚，就報紙專欄指他不接受現實，阿Paul竟公開以粗口辱罵該報館一名與他相熟的記者，又將報館高層的姓名電話及相片放上網，有傳媒為此在fb群組討論，阿Paul知悉內容後，日日在微博狂轟。
兄弟齊勸
記者之後致電身在吉林陪老婆坐月的葉世榮，他勸說：「入座率呢啲嘢artists好難控制，做出嚟個show好咪得囉！叫好不叫座，總好過叫座不叫好。」至於曾與阿Paul不和的家強，為免再次破壞兄弟情，避忌表示不發表任何意見。
七月十七日晚，家強刻意將五個月細仔黃耀陽的BB相放上網，希望藉此淡化事件，但阿Paul及Paul迷無理會，繼續不停鬧。第二日（十八日）深夜，家強留言微博：「致Beyond歌迷，大家請緊記黃家駒所創造的Beyond是宣揚和平與愛，希望大家冷靜處事，共勉之。」
唔夠一個鐘，阿Paul回應：「記得年輕時家駒在長沙拿鐵叉去替好朋友尋仇嗎？和你的記者朋友說吧，忍忍忍，醒醒啦！正義和戰爭是不同的。」
家強回話：「幫你唔知，話你唔好意思，要悟，未必太遲，你們要曲解我，我冇話可說。」
上週二（十七日），家強上載細仔耀陽的可愛照片，寫道：「全是愛，世界需要愛與包容……」但戰火愈來愈激，平息不了阿Paul怒火。
阿榮唔肯做「三十周年Beyond紀念騷」，有人說要炸其微博，他形容此乃恐嚇行為。有fans罵世榮在大陸混飯食，信佛的他也起火。
在內地陪妻子安胎的阿榮，連日來沒有發言，也被fans罵他不出來挺阿Paul，又笑他是跑龍套（二打六），家強更加是廢物，總之係咁鬧！鬧！鬧！
一位Beyond fans狂鬧家強做「狗屎強」，指他好食懶做，和阿Paul不和，家強說：「佢X到我仆*！」
辱罵狗屎強
此話一出，雙方歌迷即開拖，不少Paul迷狂炸家強微博，指他靠阿哥（家駒）冇用，唔做嘢，其中一個廣西rock友激到叫他「狗屎強」、「搞屎棍」、「日想夜想用三十周年搵錢」等。
家強出聲被Paul迷洗版，世榮沒有在微博公開發表任何言論，也被火燒連環船。
被嗌「狗屎強」的家強，週一晚（廿三日）一家在機場等上機去日本，接受電話訪問說：「我有睇到呢個人鬧我，我出聲從來都係想平息件事，想幫阿Paul！唔係搞事，佢哋（歌迷）唔諒解無辨法，嗰個人係咁鬧我係一篤屎，咪當睇《不文集》囉，唔痛唔痕，如果幫到阿Paul，俾人鬧有咩所謂？」
○九年家強與阿Paul搞破冰演唱會，家強說：「我哋唔想fans覺得我哋唔團結，個騷阿榮唔得閒，所以佢先冇份。」以證兄弟情深。
週一晚（二十三日）打十號風球，家強與日籍妻子及兩個囝囝滯留機場多個小時後，才起程到日本，他抱着囝囝等上機，俾人鬧也不是一回事。
叫歌迷反省
至於身在吉林的世榮，唔出聲也被指唔撐兄弟。「其實我有發微博，係講打內戰，暗示大家唔好再內訌，尤其係歌迷，鬧人係好幼稚。我覺得家強講得好啱，家駒宣揚嘅Beyond精神係和平與愛。我冇乜嬲唔嬲，其他成員都有個別支持者。」
對於拒做「Beyond三十周年」被歌迷威脅及罵他靠Beyond招牌搵食，世榮終於發火：「呢啲係恐嚇！Beyond咁多年冇喺大陸宣傳，呢十年我喺度做緊，早年係有主辦商借意用Beyond個名搵我出騷，所以而家我睇合約好小心，如果係『前Beyond成員葉世榮』無問題，憶蓮同學友唱Beyond歌就得，我就唔得？」
至於阿Paul則回覆本刊說：「邊個中傷Beyond任何一個，我就×爆佢！」
狂躁雙週
躁Paul事件搞足兩星期，牽涉在內的人愈來愈多，雖然近日他已收口，但Paul迷卻繼續做嘢。
Beyond○三年首次重組開了八場演唱會，九九年散band再合體，當時Beyond三子表現團結玩得開心，慶功宴當晚更與記者大合照玩到兩三點。
17/7指家強被利用
家強強調Beyond宣揚和平精神，勸諭大家平息怒火，阿Paul即指記者從中挑撥：「你看：她又在挑撥你和我了，看來你又一次中計了，但我沒有，無論她怎利用你，你一樣是我的好朋友。」
18/7鬧錯人唔道歉
阿Paul大鬧報館記者，事後知道怪錯人，即留言轉軚：「別罵了！真正黑手是其編輯，錯不在她，是非我會分。」卻無道歉。
朱茵加入
朱茵留言力撐阿Paul：「你永遠是我的戰郎。」阿Paul回話：「放心吧，有我在，沒有人可傷害你和我們的寶寶。」
20/7自認爛仔
「有些娛記說我是爛仔，以為可以抹黑我，但我不氣，因為我不會報仇，我只會向不公義反擊。」「我就寧願做個頂天立地光明磊落的爛仔！君子這兩個字實在害人不淺，要算就現在算。」
21/7變文化人
阿Paul突然多謝傳媒，「貫中在此感激，希望你們喜歡我的」，態度飄忽，又指自己是文化人，一時一樣。
