以前Makiyo係《康熙來了》嘅常客，但由於官司纏身工作證被撤銷，同小S有排都冇機會再同台。
睇完條題，可能你會話：唓！Makiyo唔教都壞㗎啦！
事情是咁的，話說自從Makiyo醉拳打傷的士司機後，佢聲稱已經戒咗酒，由於傷人案排期到8月1日重審，冇工開冇收入嘅Makiyo，閒來會做義工，學畫畫學英文學瑜伽，日使一、二百蚊台幣，吃喝玩樂要搵人接濟。
而身為好姊妹嘅小S，早排就請Makiyo同侯佩岑，到姐夫汪小菲開設嘅餐廳開餐，之後响微博留言話：「今天跟姊妹淘在台北俏江南吃飯喝酒，開心！」
Makiyo話戒酒，小S居然要人破戒，佢事後解釋：「Makiyo當然沒喝，是兩位已婚婦女在喝！」
有飲冇飲真係戒定係得把口，小S對住疑似想戒酒嘅Makiyo飲酒，係就係唔啱，不過呢排小S的確好心煩，由佢孭飛做主持嘅節目《康熙來了》，收視每況愈下，由高峰期2.18收視，跌到得番0.56危險界線，尤其係小S放完產假回歸，收視跌多兩錢重，咁愁，唔怪之得要飲番兩杯啦！
小S上載自己飲到面紅紅嘅相，力證當晚得佢同侯佩岑對飲，Makiyo冇份。
之前小S放產假，家姐大S代班做主持，收視升咗唔少，反而小S回歸後收視一集低於一集，最低見過0.56，得12萬幾觀眾捧場，節目監製開始諗計改節目內容，希望可以起死回生。
冇工開，Makiyo履行做義工嘅承諾，拉埋同樣牽涉入的士司機傷人案嘅湘瑩，幫慈善組織義賣餅乾籌款，努力洗底。
