霍啟剛（小圖）準老婆郭晶晶，出席完活動就由司機接走，直返霍家大宅。
前晚9點幾跳水皇后郭晶晶盛裝出席Max Mara喺將軍澳邵氏片場搞嘅時裝騷，雖然同霍啟剛嘅婚期被Auntie葉蒨文爆話要改遲啲，不過都係小問題啫，冇影響到晶晶成晚睇騷嘅心情。晶晶成個派對就坐喺李民橋同傳大肚嘅老婆身邊傾偈，其他人都冇乜點理佢。大會公關對於呢位霍家未來新抱就好緊張，全程至少有兩名公關招呼，仲有大會保安企喺身邊，難怪又冇人同佢傾到偈嘅。晶晶好畀面坐到完騷至走，之後大會保安護送咗跳水皇后上七人車，架車直駛去沙宣道嘅霍家大宅。
《今日我至煞》一入豪門深似海，睇吓霍家門前隻石獅子咁巨型就知！
李民橋咁大膽搭住晶晶膊頭？其實只係第二個人隻手，咪睇錯呀！
晶晶有大會保安同公關全程傍實，仲邊有人敢埋佢身。
大宅嘅傭工一見到未來霍家長房新抱返嚟即刻出嚟開門，見到有記者影相，傭工個個都好緊張舉手遮擋，反而坐喺車入面嘅郭晶晶就好淡定。不過好戲在後頭，當平時重門深鎖嘅霍家大宅打開門嗰一刻，更震撼嘅事就出現眼前，原來霍家嘅正門放咗對成層樓咁高嘅石獅子，嗰種氣勢有啲似睇緊《木馬屠城記》嗰隻馬咁，認真巴閉。
