最近忙緊鄭伊健演唱會嘅林珊珊，對於個女嘅感情事，睇嚟都冇咩時間理。好似佢細女李怡（花名野人）同樂隊「24味」成員阿肥（陳偉雄）拍拖年多，十足孖公仔咁，去到邊都黐住。上禮拜三（11日），阿肥同埋兩個「24味」成員出席眼鏡活動，而李怡一早就喺場裏面等緊。
當晚見佢兩個喺場內各有各玩，同friend隊啤酒吹唔停，鬼咁happy！不過當阿肥一見有人影相就變晒樣，即時走埋女友身邊，仲無端端啤足媽咪姐一分鐘先肯罷休。其實呢個男友躁開有前科，繼早輪涉夜場打傷人，啱啱過咗嗰個禮拜，又三次超速駕駛。個底花成咁，唔好話林珊珊，連媽咪姐都唔放心！
阿肥同李怡喺活動上本來企開兩邊，不過佢一見媽咪姐，就9秒9撲埋女友身邊，怒啤藐嘴。唉，護花唔係靠個惡樣嘅！
李怡同阿肥打得火熱，一齊無耐已經將牀照放上網，當年未婚生女嘅林珊珊都話，終於明白做人阿媽甚艱難！
阿肥早輪先涉夜場打傷人，上個禮拜又三次超速駕駛，之後仲公開放上網。後生仔，知唔知個錯字點寫呀？
阿女，俾杯涼茶佢飲啦！﹙設計對白﹚
