新劇《飛虎》原本俾TVB當炮灰，誰知收視愈升愈有，諗住拍埋呢套就停吓嘅女主角宣萱都話估唔到！講開又講，佢今次做Madam非常cool，查案搏老命，冇拖拍dry爆，同現實中嘅佢真係有幾分相似。自從上年同老外獸醫分手，宣萱就同收養番嚟嘅流浪狗相依為命，日前媽咪姐就見到佢帶兩隻心肝寶貝去睇醫生。
難得溫柔
狗狗通常都好驚睇獸醫，等候期間宣萱不停安撫佢隻寶貝狗，盡顯柔情一面。
冇咗御用獸醫，呢位愛心Madam由港島半山屋企揸車去旺角診所，雖然有賓賓同行，但佢唔會假手於人。等睇醫生期間見佢好有耐性去安撫狗狗，又摸又錫，之後仲同獸醫傾咗好耐。記得早前歐陽震華話宣萱係全TVB最惡死女藝員，對男人起晒槓，對狗就千依百順。唉，聽媽咪姐講啦，將你對狗嘅一半溫柔去對待異性。男人，其實都係簡單而可愛嘅動物嚟架！
冇拍劇一排，宣萱日日留家養精蓄銳，真係發福唔少，背肌厚晒腰粗晒！
因為有一隻狗執番嚟已經有病，要長期食藥，所以宣萱非常着緊，臨走都同獸醫、護士傾唔停。
我其實外剛內柔架！（設計對白）
