TVB啲劇雖然被指「行貨」，但偶爾都有一、兩套佳作嘅。好似上年套《飛虎》咁，口碑唔錯㗎，仲打算開續集㖭。點知女主角宣萱推劇唔拍喎。
咪以為宣萱扭計，媽咪姐收到風，TVB曾派出高層梁家樹同宣萱傾續約，兩人相識多年，老友鬼鬼，梗係傾成事啦。不過去到藝員科竟然被ban。原來藝員科某高層一向同宣萱唔係好啱key，即使有劇推出，都好少幫宣萱宣傳。
既然係咁，都無謂留低眼寃啦。最近宣萱以自由身身份為now TV拍咗個寵物節目，同大家分享佢養小動物嘅心得，之前又拍咗個特輯，暢遊南非㖭。沒有TVB嘅日子，宣萱都撈得好掂。
周二（22日），宣萱邀請郭秀雲同佢隻豹貓上節目。據知節目會4月出街，各粉絲留意嘞。本身養開狗嘅宣萱出名愛動物。最近為now拍寵物節目，既可分享飼養心得，又可以接觸動物，啱晒佢合尺。
now TV早前安排宣萱到南非進行拍攝，寓工作於旅遊。最重要當然係了解下當地嘅動物生態。宣萱攬住嗰隻小狐狸，幾乖巧。
《飛虎》口碑不俗，平均28點，最高收過36，係2012年度周六日黃金時段收視冠軍。
