李詩韻大讚馬國明是筍盤，盼再合作拍劇。
馬國明（馬明）昨日與曾傳緋聞的李詩韻到沙田出席鑽飾品牌活動，大會安排馬明以鑽戒向李詩韻求婚，他替李詩韻戴鑽戒時竟手震震。兩人不時耍花槍，分開做訪問時，李詩韻大叫馬明送兩卡鑽戒，馬明則反問她是否答應下嫁，認真寃氣。
李詩韻說：「馬明買咗隻戒指畀我先啦，OK嘅，佢係筍盤。我都掛住同佢合作㗎，佢同鄭嘉穎係我最想合作嘅男演員，希望快啲開《鐵馬尋橋》第二集喇。」至於馬明否認求婚時手震說：「我係諗緊隻戒指有冇戴錯手啫。」提到李詩韻叫他送兩卡鑽戒，馬明食住上說：「佢嫁我咪送囉，不過李詩韻好多人爭，搞唔掂。」當記者提到舊女友胡定欣仍是單身時，馬明說：「其實都講過好多次啦，家大家做朋友咪幾好！」
