羅仲謙之前同傅穎（Theresa）傳緋聞多咗見報機會，但之後女方指謙仔一腳踏兩船搞到一身蟻。近日謙仔有份拍葉念琛新戲《人約離婚後》，戲中除咗同佘詩曼有對手戲外，佢仲同做模特兒嘅傅嘉莉（Kelly）演兩兄妹，有唔少同場機會。因為之前遇到桃花劫，謙仔今次唔敢隨便近女色，真係見過鬼都怕黑。
日前謙仔同Kelly、阿佘及方力申喺九龍城拍外景，可能謙仔發現有記者影相，加上Kelly着條露肩短裙，謙仔全程同Kelly都冇乜交流，就算Kelly想同佢傾幾句，謙仔都好似借咗聾耳陳隻耳咁cool到爆，但聽聞冇相機喺度時謙仔即回復熱情，同Kelly好啱傾。
噚日Kelly接受電話訪問時話已經開咗成個星期工，戲中會同小方有感情同親熱戲，但點親法就賣關子。問到謙仔對佢好冷淡，Kelly話：「當時大家培養情緒要投入角色，所以我都冇打擾佢，但平時大家有講有笑，謙仔好肯教我。」謙仔咁大隻啱唔啱佢？Kelly就話：「佢咁大隻又靚仔係吸引，但我暫時工作為先。」Kelly成日話自己係新人，其實佢除咗同周杰倫拍廣告外，以前亦演出過《無間道Ⅱ》做余文樂女友以及《當四葉草碰上劍尖時》，演出經驗絕對唔少。
from:
http://hk.apple.nextmedia ... art_id=15252179
