38歲的陳慧琳（Kelly）今年3月經歷了人生最痛，失去腹中五個月大孖女。小產後一直在家中休養的Kelly昨日終於收拾心情復工，雖然她表現堅強，不時擠出笑容，但原來她還未走出陰霾。問她今次經歷會否留有陰影，她說：「會呀，梗係會啦！」至於心情是否已平復，她坦言：「盡量唔好諗，唔提唔諗，咁應該冇嘢。」
前年為老公劉建浩產下囝囝劉昇（蝦餃仔）的陳慧琳，去年人工受孕懷有孖女，預產期本為今年7月，可惜上月孖女不幸胎死腹中，令Kelly大受打擊，即時停下手頭上所有工作好好調理身心。休養個多月後，Kelly昨日終現身復工，以代言人身份聯同曾志偉一起在尖沙嘴金至尊總店擔任剪綵嘉賓。
Kelly到達時穿黑色服裝及平底鞋，之後換上連卡佛贊助的藍色露肩晚裝、佩戴400萬藍寶石首飾及腳踏4吋高踭鞋出場。由於Kelly小產後還未完全康復，見她出場時步步為營，不時要工作人員攙扶。Kelly一如以往般貪靚，面對鏡頭時完全沒有生疏，但精神方面跟過往明顯還差一截，笑容也未及昔日開朗，也不能站立太久。
Kelly先為店舖剪綵，前後逗留幾分鐘便速閃回店舖內休息，之後她坐下來接受訪問，談及蝦餃仔時顯得十分雀躍，但一提到小產意外，她的心情即顯得十分低落。她表示身體未完全康復，暫時只半復工，要慢慢再補身，她說：「家唔可以企太耐，都係啲女人嘢。」問她是否怕子宮下垂？她說：「係啦，所以要坐吓。」何時才調理好身體？Kelly說：「現時醫生話差不多，要再畀啲時間，所以暫時只會做簡單工作，唔使企太耐。」
問Kelly會否再努力造人時，她無奈說：「睇醫生指示同埋調理好身體先再諗呢啲嘢，要完全康復先。」將來是否會採自然懷孕方法？Kelly說：「要睇醫生建議，西醫中醫都要問，家睇緊西醫，未補得住。」今次經歷會否隱隱作痛仍留有陰影？Kelly說：「會呀，梗係會啦！所以都睇定啲先，唔好太急。」心情是否平復？她坦言：「唔提就OK，盡量自己唔好諗，唔諗唔提，咁應該冇嘢。」有否告訴蝦餃仔失去了妹妹？Kelly說：「佢太細都未知發生乜嘢事，有又唔知，冇又唔知，淨係知有車車玩。」
昨日見Kelly小腹較以前圓潤，她直言：「未收得身住，着衫都大咗一個碼，要着中碼。」老公有否下令她不要工作？她說：「咁又冇，因為我日日都喺屋企煩住佢，自己太多嘢講，以前出親嚟都會有好多人同我講嘢，家只可以同個仔講，老公見到我咁就會叫我去玩仔。」
Kelly日前帶同蝦餃仔到沙灘遊玩，記者指蝦餃仔頭髮長得似小女孩，Kelly解釋：「佢自己生成咁長，我覺得好型，所以唔捨得剪。其實我幫佢剪過，之前好長，啲口水整到濕晒，我咪同佢剪咗去。最近都剪咗，但我剪咗一邊，發覺都係長嗰邊靚啲，所以佢家一邊長一邊短，都幾搞笑。」Kelly越講越興奮，她笑言：「佢家好活躍，好鍾意玩車，大車細車真車假車都鍾意，尤其去到停車場會推啲真車，以為可以推得到。」Kelly昨日也有觀看皇室婚禮，感到婚禮很莊嚴，她謂初時見到王子和王妃十分緊張，當二人手拖手望着對方宣讀誓詞時，看見兩人展現微笑，感覺溫馨甜蜜幸福。
相士話：2013可再添丁
現年38歲的陳慧琳早前不幸流產，痛失一對孖女，令她大受打擊。究竟從玄學角度來看，Kelly可有機會再做媽咪？記者昨日致電相士區仲德了解，他表示Kelly命中子星比女兒星旺，但應該還有機會有BB，他說：「呢次機會將會喺2013年，如果喺嗰年懷孕嘅話，生仔機會好大。」問到若想追個女呢？他說：「想追女嘅話就一定要到2014年木馬年，先至大機會。」
from:
http://hk.apple.nextmedia ... art_id=15211769
