■寧王允瑞珠未央生交歡，她以髮簪刺痛未央生激起性慾。
三個女人一個墟。上周五晚奉命直擊《3D肉蒲團》女性專用場開鑼，場內逾二百座位爆滿，言即，有幾十個墟圍住我！羨慕？有代價的！自問入行數年不靠嘩眾不賣八卦，用心當記者，那夜竟遭她們視作邪靈妖孽：拒絕訪問！以圍巾、爆穀遮面！無街訪無相，這篇稿凍過水。想起李漁寫《3D肉蒲團》講報應，莫非做錯甚麼，招來現眼報？
五大必睇場面！
港女敢睇唔敢認
問自己錯在哪裏，招來報應？應該是天真以為《3D肉蒲團》咁爆，做街訪易過借火，實情是比林峯阻止潘霜霜流出慾照還要難！開畫當天傍晚六時，一直站在銅鑼灣時代廣場UA戲院追尋目標，一個兩個三個，不是說趕時間，就是說沒興趣；更慘烈的一次，是眼見兩名師奶明明拿着附有警告字句的戲票興高采烈，我上前表明身份，師奶甲問：「有咩事呢？」表明來意，師奶乙已面露尷尬笑容，強行將甲拉走湮沒於人群，又泡湯。我錯在沒有好好警告自己香港人對性保守、對鏡頭極端抗拒。
上周五（15/4）是女性專用場，晚上接近十時，又跟攝影師來到同一間UA時代廣場戲院，從扶手電梯走入大堂，嘩！除了票務員和戲院經理，放眼望去都是港女，而且年齡層非常闊，由後生女到熟女甚至中年婦人都有，她們三五成群吱吱喳喳，令大堂升溫。如此大好時機，為交差拿起DV、相機起勢拍，直擊場內情況！但每當鏡頭所到之處，港女們都極速將興奮收起：圍巾、黑超（或立體眼鏡）、手袋、紙袋、雙手甚至食物，總之能夠局部或全部遮臉的都會派上用場。
個案一：阿拉伯風赧姐
記：小姐，想問你點解包到咁行嘅？（旁邊朋友大笑）不如講兩句啦！你今日最想睇到咩嘢？你包到咁實都可以照講，唔使驚！
風：唔係呀，我出風赧，你唔好行咁埋嚟！
記：你點稱呼呀小姐？
風：我唔接受訪問呀，唔好意思。
記：（無視，繼續追問）其實你最想睇到啲咩嘢？
風：我唔識答！
記：你嚟呢一場（女性專用場），係唔係驚尷尬呀？
風：（指指身旁兩位朋友）我陪佢哋o架咋！（笑）
點評
幾經反覆追問，才知道她們讀報紙廣告知道有女性專用場，至於最希望看到電影中哪些情節、場景以及道具，友人只以一句「唔識答」回應。其實食色性也，睇《3D肉蒲團》也沒甚麼大不了！
個案二：內地爆穀姊妹花
記：請問這部電影你最想看到甚麼？
爆：3D！（3D甚麼？）性慾片段！
記：請問你從哪裏來？你是哪裏人？
爆：不告訴你！
記：是不是覺得看這個女性專用場會比較方便？
爆：對對，不用那麼尷尬。
記：不好意思你怎麼稱呼？
爆：不告訴你！
點評
回答問題的內地女觀眾由始至終都沒有放低手上的爆穀和礦泉水，一邊遮面，一邊回答問題，而且大膽的說：「我想睇3D性慾場面！」明顯將扭扭擰擰的風赧女比下去！
蕭小姐
「朋友搵到有呢場，可以同其他女仔一齊睇方便啲。最希望睇到立體效果，例如個胸點飛出嚟！」
關小姐
「幾有娛樂性！幾好笑！但後段就有啲核突，例如藍燕要坐喺隻馬嘅鐵蓮花上面搞爛佢，幾血腥！」
李小姐
「用古裝去襯家香港嘅粗口，起碼令套戲個氣氛輕鬆咗。套戲都幾好笑，我畀75分！」
Ada
「想睇係因為好奇，睇吓點將色情元素用3D去拍。身邊好多女仔都想睇，但又怕醜！」
上海謝小姐
「我之前喺上海睇過雜誌報道，就已經好想嚟香港睇！」
蕭定一：網民建議女性場
「你最好就搵女記者去採訪，或者完場之後先出現，因為佢哋買得呢啲飛就唔係咁想見到記者！」「女性專用場」的幕後搞手——監製蕭定一，一早已經提醒我。言歸正傳，原來當初決定搞「女性專用場」，源於網友建議，阿一說：「我見到好多人話佢哋成班女仔去睇，如果隔籬有個男仔好似好尷尬，問我會唔會有可能整一場淨係專畀女仔睇o架？」阿一覺得意念有趣，便積極籌備，但期間遇到戲院阻力。「佢哋驚有男性會投訴歧視，我覺得唔會呀，如果係嘅佢哋睇正常場次都得啫，我覺得既然日本地鐵都有女性專用車廂，點解唔可以有女性專用場次呢？佢哋（戲院）就保守啲，我就大膽啲！」
勇字行頭，就要承擔風險，阿一必須要包辦一定數量的戲票，令戲院封蝕本門，更要聘請保安，以防有男觀眾強行闖入。結果蝕本之門根本無出現，「女性專用場」售票反應非常理想。據UA院線的資料顯示，兩場門票在電影開畫前一天（13/4）已告爆滿，並由明天開始至25/4加開7場專場，讓廣大香港女性夜晚放工後與一眾姊妹堂堂正正的走入戲院睇葉山豪「曳曳」，一嘗3D三級初體驗。
三千萬票房靠內地人
縱然有網民的利眼發現雷凱欣露胸有可能是後期加工，大叫回水，亦有人投訴見血多過見葉山豪床戰，但作為全球首套3D三級色情電影，對未入場的市民還是非常吸引。難怪娛藝（UA）院線副總經理黃韋琪（Vicky）謂對於今次票房甚有信心，對於阿一開設「女性專用場」更是讚不絕口，「因為呢類電影傳統上只有男人先會去睇，女仔呢？如果佢男朋友想睇，佢會阻止，自己去睇又覺得唔好意思。但家『女性專用場』就真係吸引到一班女性入場，對票房有好大幫助，我預期總票房會過2,500萬。」
單看票房成績，《3D肉蒲團》首日已高收200萬，較07年的《色，戒》高出一倍；開畫四天票房已累積過1,000萬，就算11點早場，部份戲院的入座率亦高達九成！事實上阿一比Vicky更樂觀，開畫當天下午已說，「Hope for the best，think for the worse.正常今日已經睇到，一套普通戲若果唔靠內地人落嚟睇，總票房係開畫數字的12至14倍。譬如我哋開畫係250萬，最後大約去到3,000萬頭。」但當年正因為有內地觀眾來港看《色，戒》，令到原本開畫僅120萬最終埋單4,900萬，「所以真係靠估，28/4之後五一黃金周內地人更多，套戲上畫第三周要靠佢哋補足！」至於Vicky就坦言今次與《阿凡達》的最大分別，就是有內地旅行社以看《3D肉蒲團》作為行程之一，「國內無得上，所以早喺個幾月前已經有人查詢包場，家約20場！」她說周五早上在UA時代廣場辦公，當時戲院未開門，已見到有內地客拖住行李於戲院門前的《3D肉蒲團》海報前看時間表，看來這班內地兵團未幾將大軍殺到！
from:
http://hk.apple.nextmedia ... art_id=15175355
