陳奕迅（Eason）日前帶病在台灣墾丁演出春浪音樂節，他沒有目擊觀眾濫藥和做愛，連穿着比堅尼的辣妹都無緣見到，又笑言他自己也是食了藥才上台的，不過是感冒藥，Eason對是次演出很滿意，希望再有類似表演機會。
陳奕迅近日馬不停蹄到處飛，日前於北京水立方演出完後，又到台灣演出2011墾丁春浪音樂節，昨日再飛北京宣傳新電影。Eason身患感冒，帶病演出春浪音樂節，但一上台就與現場近四萬觀眾一樣興奮，落力獻唱，掀起高潮，事後他說：「之前擔心感冒會影響演出，所以做得圓滿成功係特別開心，春浪真係好好玩，喺台上迎住海風咁唱歌，好爽，觀眾又熱烈，聽講今年有20萬人喺墾丁玩，希望將來有機會再參加呢類表演。」
對於有觀眾在台下濫藥、醉酒甚至做愛，Eason笑說：「我都有食藥，不過係感冒藥。其實表演時都唔覺有人濫藥，見到台下嘅觀眾都好健康正常，連着比堅尼嘅人都見唔到，其實嗰晚氣溫得十幾度，着比堅尼唔凍病先怪。」
Eason回憶當日坐私人飛機到高雄，再坐車到墾丁綵排演出，行程緊密，Eason說：「完show都凌晨1點喇，再塞一輪車返酒店已經3點，第二日又早機返香港，我只可以喺車上經過望到墾丁個沙灘一眼咋。」但Eason謂無論如何年輕人都不可以濫藥，他說：「要開心有好多方法，單單音樂都可以令人好high，何必做啲對身體有害嘅事呢？」
談到Eason為亞視拍攝特輯《觸動陳奕迅》，探訪露宿者，又扮的士司機接客，但也只有3點收視，即約19萬人收看。
Eason說：「我冇諗過個節目要有幾多收視，冇所謂啦。我覺得最緊要大家睇完節目，收到裏面嘅信息，多啲關懷社會，着緊環保，同認識多一層陳奕迅。我喺facebook都有再叫大家記住23號幫香港社區組識協會買旗籌款。」Eason又謂相信現在很多觀眾與他一樣，不會為看一個節目趕回家，而是預先錄影及上網重溫。
from:
http://hk.apple.nextmedia.com/te ...462&art_id=15141136
