鄧紫棋（G.E.M.）處女紅館個唱，將會喺5月14至15日舉行，噚日佢喺銅鑼灣舉行記者會。佢話搵咗五個人做嘉賓，但好多歌手都覆冇期，佢仲講笑話希望搵到張學友嚟撐場。其實G.E.M.搵男朋友林宥嘉助陣咪得囉，但佢話唔想演唱會嘅焦點被轉移喎！佢話：「我唔夠膽搵佢做嘉賓，如果叫咗佢嚟又會變成話題，就係唔想咁，第日如果大家冇咁關注時先再合作。」佢避忌到連林宥嘉嘅歌都唔會唱。
不過話晒開演唱會咁大件事，男朋友點可以唔撐場，之前林宥嘉話過會喬裝去睇騷，G.E.M.話：「我都係睇報道先知，佢冇同我講喎，而且佢都冇問我攞飛。」
另外，有個色情網站，放咗阿G.E.M.張相上去，G.E.M.話公司處理緊，可能會從法律途徑追究，佢話：「嗰張相係我16歲入行影嘅，但就俾成人網站貼咗入去做簡介，其實入面條片都唔關我事，只係張相係我。家公司忙住幫我做演唱會嘅嘢，突然間殺出件咁嘅事，但諮詢過律師，話我哋可以追討。我對呢啲嘢冇意見，但係將我扯上色情網站就有啲過份。」
from:
http://hk.apple.nextmedia ... art_id=15134236
