超過一萬名市民昨參與反對財政預算案的「洋紫荊革命」大遊行，由中環遮打花園遊行到政府總部抗議，而演藝界的黃貫中（Paul）、張同祖、杜如風和MC仁（陳廣仁）也有現身。阿Paul鬧爆預算案草率，更狂鬧政府勁加煙稅，阿Paul說：「即係逼我犯法，周圍搵緊私煙買。」
黃貫中昨日下午與胞弟黃貫其及數名友人，參與反對財政預算案的「洋紫荊革命」大遊行，現身政府總部，阿Paul表示以個人身份參與，其間見他拿着攝錄機不停拍攝，原來是為寫歌攞靈感。
問阿Paul出現原因時，他反問記者：「有乜原因唔嚟？香港近期怨氣幾大，我哋做音樂，唔可以同市民社會脫節，我嚟係想聽吓市民有乜心聲，所以攞埋部DV機訪問吓人。」
對預算案有何睇法？阿Paul笑說：「如果預算案得就唔會咁啦，我覺得范徐麗泰講得好啱，預算案有啲草率，無論修正又好，俾我覺得有少少兒戲，貧富懸殊，好多人仲係失業，買樓又買唔起，煙稅更加唔使講啦！」阿Paul直斥派錢教壞細路，讓小朋友以為嘈完便有糖派。阿Paul說：「政府冇立場，逼兩下就派6,000蚊，唔係真係關心貧苦大眾，貧富懸殊問題根本冇解決。」
講到政府狂加煙稅時，阿Paul最為扯火，他說：「最反對！即係逼我犯法，周圍搵緊私煙買。知唔知邊度有私煙買？」阿Paul續說：「好唔啱，好似俾人㩒住搶，明知加咗都會照食o架啦，如果加咗煙稅之後真係落到窮人手，加20蚊我都照畀，但唔係吖嘛！點解雪茄唔加佢兩三倍呢？紅酒唔加一倍？呢啲係高級消費品，我贊成加嗰啲。如果政府真係為咗大眾着想，直情禁煙啦！好多貧苦大眾都係食煙，加煙稅對佢哋最大傷害。」阿Paul揚言煙仔照食，說罷還在記者面前吸煙。
「官僚風氣冇改變」
問會否要求特首曾蔭權和財爺曾俊華下台？阿Paul沒好氣說：「冇用！叫下台冇用，係風氣問題，官僚風氣冇改變，換人都一樣。」對財政預算案有甚麼建議？阿Paul說：「將免稅額提高啲，收入多嘅人就要交多啲稅。」為何不帶女友朱茵前來？他說：「驚推撞得犀利，同埋佢有嘢做。」阿Paul最後還笑說：「我覺得香港有樣嘢最優秀，向全世界、向國內同胞展現，睇吓我哋嘅遊行係點！」
除阿Paul外，杜如風、導演張同祖、MC仁及地下樂隊Hardpack也有參與遊行，張同祖鬧爆政府說：「呢個政府真係不知所謂，注資去強積金係錯嘅做法，俾人鬧完財爺先發爛渣每人派錢6,000蚊，完全係浪費，所以特首同財爺都應該落台。」
MC仁昨抱住一隻狗遊行往政府總部，無綫一名記者拿着咪牌準備訪問他，他竟然不屑說：「無綫，快啲執笠啦！」其他傳媒再上前問他來遊行有甚麼訴求？他舉起小狗說：「免費狗糧。」問他是否與朋友一起來？他不耐煩說：「同豬朋狗友嚟。」全程九唔搭八。Hardpack昨日扮作不同社會階層人士參加遊行，其中扮師奶的成員Kevin表示現時師奶買棵菜也貴過人，扮清道夫的成員Joseph則笑言加煙稅後再沒機會在街上執煙頭。
此外，昨日舉行簽唱會的Eason則贊成加煙稅，他表示：「呢啲始終係唔好嘅嘢，打擊係啱，百害而無一利，我自己真係好少食。」
from:
http://hk.apple.nextmedia ... art_id=15046257
