王祖藍、鄭欣宜及鍾欣桐等前晚犧牲與家人吃團年飯，到將軍澳錄影《勁歌金曲》，可惜三人表現均欠佳。祖藍兩日前受命唱別人的rap歌，甩嘴忘詞情有可原，鍾欣桐因生病要咪嘴，欣宜唱了四次《大日子》仍忘記歌詞，她反應最大，得放聲大哭，新年流流我見猶憐。
前晚年三十晚是家人們開心吃團年飯的日子，王祖藍、鄭欣宜、鍾欣桐、林欣彤及羅敏莊等則在將軍澳電視城錄影《勁歌金曲》，惜祖藍、欣宜及鍾欣桐均表現欠佳，欣宜更錄到放聲大哭。
王祖藍頂替李治廷，與林欣彤獻唱賀歲片《我愛HK開心萬歲》主題曲《I Love Hong Kong》，因祖藍不是原唱者且要rap，他錄了四次仍甩嘴忘詞，不停NG，到第五次才錄好，阻慢了錄影進度。事後祖藍說：「唔好意思，我做咗李治廷替身，早兩日先收通知要我唱，我都好驚。」
據聞祖藍綵排時一次搞掂，他說：「始終對住鏡頭會驚啩，有啲壓力，我又唔係rapper，多謝林欣彤忍我。」他謂已和家人吃團年飯，女友李亞男要開工沒一起吃，但會與她相約一起去拜年。
之後輪到欣宜錄影，她要唱陳慧琳的《大日子》，但竟然也因記不到歌詞而不停NG，明顯對歌曲生疏，錄到第四次也錄不好，欣宜得忍不住哭了起來，幾乎收不到聲，導演惟有跳錄其他人的部份。
返入後台時，欣宜本不欲接受訪問，後來也配合回答，她哽咽說：「我一講又好想喊o架喇，真係好，記唔到歌詞，年三十晚搞到人哋遲收工，我唔講喇，又想喊，我要培養情緒再唱過。」
自言帶病上陣的鍾欣桐，獻唱冠軍歌《放低過去》時，竟要咪嘴，她接受訪問說：「我綵排已經唱唔到，把聲好似o靚坤咁，男仔聲，我之前喺內地拍劇狂咳呀。」有指她病到兔年甚不吉利，她即謂：「可能今晚即刻好番呢，不過我都唔會出去拜年，驚凍親。」
from:
http://hk.apple.nextmedia ... art_id=14940040
