劉德華前晚請來陳奕迅（Eason）及曾志偉兩位口水佬當紅館個唱嘉賓，Eason笑謂要與華仔翻拍《神鵰俠侶》，他扮鵰只說一句對白，然後做出「鵰」字口形。志偉在大讚華仔之時，又指華仔甚麼都有，連老婆也有，激得華仔大喝，哭笑不得。
劉德華前晚在紅館舉行第18場個唱，嘉賓陳奕迅出場時發揮吹神本色說：「頭先我集中精神聽你唱《仍唱我的歌》，好感動，差啲俾你搞喊。不過我頭先同你一個叫Peter嘅朋友傾偈，佢對電影好有興趣，仲話想翻拍《神鵰俠侶》，我應承咗，睇你有冇興趣，我個角色簡單過你好多，淨係做隻鵰，對白得一個字。」
Eason隨即以雙手扮雀鳥拍翼動作，兼做出說「鵰」字的嘴形，但讓人覺得他在說粗口，惹得全場大笑，Eason續謂華仔對神鵰說的話也得一句：「鵰，你帶我去見小龍女。」華仔笑到碌地說：「我好有興趣拍，句對白唔難講，我平日都有講。」後來Eason獻唱《明星》，觀眾掌聲雷動。
華仔其後介紹志偉出場，志偉穿着間條睡衣及拖鞋配合，他說：「我等足17場，日日想打尖做嘉賓，佢都話冇位，我練埋《明星》都唔得，惟有晚晚着件睡衣喺度等，本來準備好多嘢講，但知道前面係Eason就唔使喇。」志偉大讚華仔很勤力，曾見華仔拍戲多日沒睡，遂叫他回車上休息，怎料華仔在車上卻是在改歌詞，志偉說：「我喺電影圈咁耐，冇見過一個人比佢更勤力，最重要係佢勝不驕。」
志偉繼續滔滔不絕：「唱歌初初啲人話佢似唱粵曲，家又掂，好多人叫我睇佢concert，話佢跳舞好過郭富城。」華仔聞言笑到整個跌坐地上，對觀眾說：「你哋行出紅館門口唔好話呢句嘢係我哋講，係你哋自己覺得o架唔該。」
志偉繼續亂講：「你喺演藝界乜都有晒，家有埋老婆。」犯禁忌談他老婆，華仔聞言坐在地上大喝一聲，全場歌迷起哄拍掌，志偉開玩笑說：「咁大反應呀？我都未話你有細路哥。」華仔即作狀癱倒地上，掌聲更響，志偉說：「冇o架冇o架，唔好講嘢喇。」二人合唱《笨小孩》，還請了幾位少林武僧出場耍功夫伴舞，其中一位小武僧連打十個空翻，極之精采。
from:
http://hk.apple.nextmedia ... art_id=14846870
