許鞍華執導、周慧敏、吳君如、陳偉霆同張兆輝主演嘅《得閒炒飯》噚晚喺銅鑼灣舉行首映，出席嘅演員大部份都係着黑衣，以示哀悼喺菲律賓慘死嘅香港同胞，近日有傳懷孕嘅君如同其他演員嘅心情睇落去都幾沉重，噚晚君如喺首映話：「噚日（即前日）睇新聞知道香港旅行團喺菲律賓出咗事後，我哋心情好難過，都有諗過係咪要取消今晚嘅首映，但既然一早預咗，生活又要繼續過，我就同意照搞落去，但就講明唔好有任何慶祝儀式，最好低調啲，例如大家一齊着黑衫會比較適合。」
周慧敏就話唔應該用暴力解決問題，搞到結果唔好，佢仲話會為死者同佢哋嘅家屬祈禱。吳君如又話希望香港政府可以做多啲嘢去慰問死傷者及家屬，佢仲話：「突然間好想開番咪，宣洩一下啲唔開心嘅情緒。」
from:
http://hk.apple.nextmedia ... art_id=14379630
