黃曉明同Angelababy雖然冇承認過拍拖，但係呢段地下情其實已經人所共知，近日周柏豪無厘頭做咗佢哋嘅第三者，仲俾Baby嘅fans喺微博度留言狂鬧。
噚日周柏豪現身RoadShow嘅寫字樓接受訪問，佢透露啱啱先喺洛杉磯同Baby拍完adidas廣告返香港，難得咁開心，周柏豪咪將同Baby喺當地嘅合照貼上微博，點知就惹到周身蟻，佢話：「有Baby嘅fans留言叫我唔好打Baby主意，佢仲以死威脅，我咪同佢講話唔會。」但周柏豪嘅fans見佢俾人鬧梗係代佢出頭，佢話自己fans就問嗰位Baby嘅fans，係咪佢自己諗多咗，結果就引起罵戰，搞到佢要出手安撫。
怕唔怕黃曉明呷醋先？周柏豪表示：「呢樣我冇諗，我都唔識佢，我真係幻想唔到佢嘅感受，不過我係絕對唔會做第三者。」雖然今次個trip搞出個大頭佛，但係周柏豪對呢個行程好滿意兼好開心，因為佢喺當地受到好好嘅招待，佢同Baby都有一架旅行休息車跟出跟入，唔怪得周柏豪話覺得自己好似巨星啦！
此外，Baby上年成功晉身日本市場，今年就積極打入台灣市場，仲榮任台版《Vogue》8月號封面女郎，大講入行以嚟嘅心路歷程，不過就冇提感情事，訪問中Baby仲透露喺日本工作壓力好大，仲要大喊嚟減壓。除此，Baby都成為咗《S Cawaii》同《Glamorous》兩本日本雜誌嘅封面女郎，佢都算巴閉。
from:
http://hk.apple.nextmedia ... art_id=14328213
