「百果園E神」陳靜本於昨日硬撼o靚模一姐周秀娜比試人氣，兩人分別在尖沙嘴及旺角的商場同時間舉行寫真簽名會，結果娜姐因黑色暴雨警號而取消活動；陳靜就頂硬上，但抵會場時突然暈低入院診治。
貿發局逐o靚模出書展，但一眾o靚模為谷寫真各出奇謀。既然書展不留人，周秀娜和百果園E神陳靜（DaDa）昨日就移師商場開簽名會，周秀娜率師妹A Lin.等出動流動車在MK朗豪坊插旗；陳靜、Liz及Ayu則在尖沙嘴新太陽廣場打躉，兩幫簽名會在下午6時同時間舉行，豈料娜姐因黑色暴雨打退堂鼓，陳靜就暈低入院，夠晒戲劇性。
陳靜昨抵商場停車場時，同行的Liz指陳靜甫落車隨即暈低，被攙扶到後台休息，其後陳靜面青口唇白現身，氣若游絲地說：「我病咗幾日，發燒。」她由經理人施念慈傍實舉行舞獅點睛儀式後，即往法國醫院求診，剩下Liz和Ayu撐大局。
Liz提及陳靜暈低即眼紅落淚說：「DaDa病咗，勉強撐住出席活動，之前佢去髮型屋整頭時俾雨淋到濕晒，點知頭先到停車場，佢一落車就跌落地下。」Liz指陳靜已睇過幾次醫生，得悉她感冒菌入眼，但她前言不對後語說：「佢都忙到冇時間睇醫生。」
晚上8時陳靜到醫院，她沒精打采說：「之前我喺商場停車場落車時，休克咗5分鐘，簽名會又有啲唔舒服，有啲感冒，我唔想fans失望先死頂。」問她是否壓力大？她說：「唔係，但個人成日好緊張，唔夠瞓好攰，聽日會休息吓。」醫生為陳靜檢查後，證實她耳水不平衡，但因沒床位請她返家休息，陳靜謂今日會休息一天取消宣傳。
至於另邊廂的周秀娜，前日以紅衣look玩寸書展後，昨本繼續MK造勢，沒想到活動舉行前半小時，天文台發出黑色暴雨警告訊號，活動被迫取消，娜姐在電話中說：「噚日紅色暴雨裝迎燦都，本來今日去旺角同fans簽名，點知掛黑色暴雨警號要臨時取消。24號（明日）我哋會喺尖沙嘴搞簽名會，攞咗籌嘅fans到時可以落嚟補番簽名。」她又說：「我好後悔噚日講紅色暴雨，個天就用黑色暴雨撼我嘅紅色暴雨。」
from:
http://hk.apple.nextmedia ... art_id=14268470
