吳彥祖和名模Lisa S.今年4月在南非舉行婚禮後，下周在港補擺婚宴，不過昨日吳彥祖仍要在蘇州趕戲，最後一天戲份更狂咀內地女星高圓圓，吳彥祖表示內心對不起太太，笑言要Lisa S.追殺導演杜琪峯。
吳彥祖下周三（28日）在跑馬地馬會補擺喜酒，但昨日仍要為杜琪峯和韋家輝新片《單身男女》到蘇州趕煞科戲，他昨日更背妻偷食，在戲中狂咀高圓圓。吳彥祖在戲中扮演一名設計師，是百分百好男人，但事業上卻遭受挫折，幸得高圓圓從旁支持，不過另一壞男人古天樂卻同時愛上高圓圓，三人發展成一段錯綜複雜的關係。
吳彥祖昨日獲導演杜琪峯安排與高圓圓跪地求婚和深情一吻，對於鏡頭前的艷福，吳彥祖似乎不太受落，更覺得對不起Lisa S.，他昨日說：「估唔到喺呢個時候，我竟然做出對唔住太太嘅事，就叫佢追殺杜導演吧！」吳彥祖講笑完即補充太太會體諒他，並說：「其實拍戲佢（指Lisa S.）會明白嘅，佢唔會咁小器。」
吳彥祖在現實生活已娶得嬌妻，可是昨日在片場拍攝向高圓圓求婚的戲份，試戲時跪地拿鑽戒求婚時竟一臉尷尬，不時失笑，吳彥祖向杜琪峯說：「我真係從來冇試過咁樣嘅。」
到底吳彥祖當日怎樣向Lisa S.求婚？他笑說：「有一日我同佢食飯，大家就傾到生BB嘅問題，大家都覺得係時候，我就問佢係咪應該先結婚至生BB，佢話係，然後我再問佢係咪願意嫁畀我，她都話係，我就係咁求婚啦，所以啱啱跪地求婚，我都係第一次。」吳彥祖又說：「雖然我喺戲中同高圓圓咀咗，但唔代表佢就會同我一齊，聽講佢同古天樂咀戲激過我嘅10倍。」
from:
http://hk.apple.nextmedia ... art_id=14264360
