有樂壇教父之稱的唱歌老師戴思聰昨日病逝，生前桃李滿門的他甚得徒弟愛戴，眾人得知他去世的消息後均感難過。至於早年曾與老師戴思聰為合約問題發生爭拗的陳曉東（東東），表示彼此已冰釋前嫌，昨日他更特意由北京趕返香港，可惜未能見到恩師最後一面。
著名唱歌老師戴思聰昨日因急性冠心病去世，他的眾多學生均感哀傷，連早年曾與他發生爭拗的徒弟陳曉東和鄭嘉穎，也感到非常難過。陳曉東日前得知戴思聰病危入院後，昨早特地由北京趕返香港探望恩師，可惜他上飛機前已接獲恩師病逝消息，未能趕及見戴思聰最後一面。
陳曉東昨午約1時返抵香港，對於來不及見戴思聰最後一面，他傷感地說：「今朝返嚟諗住可以見到老師，但上機前知道老師走咗，我會留兩、三日睇吓有乜嘢幫到手。」他其後又在電話中透露前晚曾與戴思聰細女戴辛尉（葳葳）通電話，他說：「葳葳嗰時用國語同我講，話東東你可不可以快點回來跟老師說幾句話，他很想念你。」
陳曉東表示返港途中回憶了很多與老師的相處點滴，例如與老師第一次通電話，以及首次登門時師母請他食蘋果，他哽咽地說：「我好記得嗰個蘋果，我係老師嘅學生裏面，其中一個佢最錫嘅學生。」
對於師徒二人早年的合約糾紛，陳曉東指事件早已不值一提，他說：「矛盾歸矛盾，我希望我哋嘅感情唔會變。矛盾或者糾紛，相比起人與人之間嘅感情，唔算係乜嘢。」他又指與老師和好後，不時會通電問候，他說：「我喺國內做嘢，冇機會成日返嚟見面，冇聽過佢有心臟病，我只係知佢眼同腰有事。」
戴思聰曾約好到北京住在陳曉東家，由學生帶老師遊玩，可惜如今天人永隔。陳曉東謂難忘老師的循循善誘，今次返港期間會慰問師母，越說越難過的他最後更哭着說：「佢（戴思聰）有啲地方唔開心，無論誤解又好，或者係輿論都好，我希望各位媒體嘅朋友可以喺最後呢件事度，可以幫吓佢。」
至於06年同樣因合約問題與戴思聰鬧翻的鄭嘉穎，雖然自此沒與老師聯絡，但嘉穎昨日知道戴思聰死訊後說：「聽到消息好難過，我哋始終師徒一場，希望師母唔好咁難過，佢嘅家人可以節哀順變。」
馬浚偉前日曾到醫院探望老師戴思聰，他昨日得悉死訊後說：「戴老師絕對係我嘅伯樂，我希望佢一路好走，師母同佢嘅家人要堅強啲，節哀順變，跟住落嚟嘅日子要好好生活落去。記得當年跟戴老師學唱歌，佢好似爸爸咁對我，我哋咁多年感情好深厚。」
戴思聰的首徒是憑一曲《我是中國人》紅遍中港兩地的張明敏，張明敏昨日在電話中說：「佢係一個醉心培訓學生嘅老師，一直好努力去做。好可惜後期嘅師弟比較現實，有好多唔公平嘅語言，令佢後期唔係咁開心。我都想同佢搞番個尊師重道演唱會，等啲人明白乜嘢叫做尊師重道。」
問張明敏可知戴思聰有否未了心願時，他說：「佢想搞個師生演唱會，佢近期都好積極去做呢樣嘢，搵華仔（劉德華）同黎明。」張明敏又指戴思聰早年與鄭嘉穎和陳曉東的不和事件，令其名聲蒙上污點，戴思聰生前因此甚為不快。
此外，近日為演唱會積極備戰的林峯也是戴思聰的學生，昨日他在葵芳舉行簽唱會時，表示難忘這位啟蒙老師，他說：「我十幾歲時跟老師學唱歌，近幾年冇乜聯絡，聽到消息覺得幾意外，會問候吓佢家人。」
from:
http://hk.apple.nextmedia.com/te ...462&art_id=14253473
