去年o靚模群起現身書展搞簽名會，一度成為社會話題，今年香港貿發局特別關注事態發展，先出招成立顧問團，以品味低俗叮走周秀娜為首等寫真幫o靚模入場，連帶推出寫真集的非o靚模藝人林莉和傅穎都無一倖免。EQ甚高的周秀娜無懼大會打壓，準備在書展期間潛入會場玩轉書展，其他o靚模如浸大咪神楊梓瑤等也有樣學樣，絕地度橋反擊與貿發局大鬥法。
今年書展主辦單位貿易發展局打正旗號以形象健康、老幼咸宜谷宣傳，上月找來13位文化教育及傳媒代表組成顧問團，向一班拋胸露肉的o靚模開刀，批判她們的噴血寫真集品味低俗，雖然准許那些寫真集在場內發售，但禁止她們在書展期間進場搞造勢簽名會。
去年書展吸金o靚模周秀娜與新舊8模師妹日前度橋出蠱惑，推出純文字copybook重新申請進入書展，但前日卻接獲貿發局以「未達健康形象」為由踢出書展，自稱被歧視的o靚模周秀娜決意再度新橋潛入書展，其他o靚模如浸大咪神楊梓瑤（Carol）和Rainbow等見狀也追隨，o靚模決意出招突破貿發局和顧問團的防衞線。
周秀娜未能憑純文字copybook殺入書展甚為無癮，所以她計劃屆時會微服出巡扮書迷闖關，她昨日在電話中說：「唔入書展做嘢，我樂得輕鬆行書展，我咪當行花巿囉。」舊8模DaDa對於copybook被拒入書展說：「有相嘅書入唔到書展，咁書展搞嚟做乜？歧視呀，好想去平機會投訴。」而A.Lin謂：「唔好抹煞我哋機會，只係想出copybook教人寫正字。香港係咪就快陸沉，乜都唔畀做。做o靚模成日俾人鬧，不如叫我哋老模喇！」
同樣遭滑鐵盧的Carol也不氣餒，她昨日抵死地說：「唔搞簽名會咪自己行書展囉，我想幫出版商做暑期工，入場幫手，放暑假梗係要做暑期工，賺到外快咪行書展買啲教科書返學。」
Donut o靚模團大師姐Rainbow則打算率眾帶冬甩入場餵飽fans，Rainbow昨日說：「其實我哋本寫真集最早開賣，都賣得七七八八，唔喺書展搞簽名會都冇所謂，不過去唔到令fans失望啫，所以我哋Donut到時會約埋突擊現身書展，仲會喺攤位請書迷食冬甩。」
舊8模成員陳嘉寶今年孖好姊妹蔡穎恩推出的寫真集都遭顧問團封殺，兩女大感無奈，陳嘉寶昨日在又一城出席活動時說：「今次係有殺錯冇放過，我都唔知o靚模嘅定位係乜，大家都知我哋形象係點，殺錯良民都冇法！」
黃秋生昨日寸o靚模是性工作者，百果園E神陳靜昨晚說：「我入行好多年，係人哋界定我係o靚模，好想快啲脫離o靚模行列。我唔算係o靚模，應該秋生唔係講我哋，如果佢想睇我本寫真，可以送本畀佢睇。」
張震舊愛、模特兒吳家欣（Tanya）昨日對於書展禁o靚模搞簽名會宣傳一事說：「唔使唔畀，搞個成人區畀佢哋，18歲以上咪可以入囉。」
from:
http://hk.apple.nextmedia ... art_id=14201984
