組合Twins一連三場「Twins人人彈起2010演唱會」前晚終於曲終人散，好友如容祖兒及媽咪、周麗淇、蔡一傑、黃偉文、吳浩康及女友莊思敏和王晶等捧場，富商劉鑾雄的紅顏知己甘比及賭王愛女超蓮不約而同撇下另一半，跟女性朋友到場睇騷，其間她們看得相當投入，不時手舞足蹈及拍照。
當阿Sa和阿嬌唱到《相愛6年》時感觸落淚，阿嬌說：「呢兩年真係發生好多事，好多謝你哋仲支持我哋，令我哋再有機會開演唱會，一切都唔係必然。」在旁的阿Sa也說：「好驚呀，唔知會唔會仲有下一次，可能今次係最後一次。」阿嬌認同說：「我會好珍惜，好用心咁去表演，好怕冇第二次，多謝你哋畀機會。」阿Sa還幫阿嬌拭淚。
大師姐容祖兒和老闆楊受成及楊太坐在台下撐場，之後祖兒被孖妹拉上台，她說：「我由細睇到你哋大，做乜唔多謝我，我咁支持你哋睇足咁多場。其實我冇乜朋友，五隻手指數得晒，你哋係其中兩個，你哋呢兩年真係唔易過。」阿嬌不怕重提淫照事件，對祖兒說：「我哋Twins兩年前原本係要開演唱會，但因為發生事，結果你幫我哋頂咗個期開演唱會，我真係好感激你。」語畢祖兒和阿嬌都眼濕濕。尾聲時，蔡一傑、吳浩康和周麗淇等上台和孖妹合唱。結果Twins兩度安哥，約11時45分完場，阿Sa開心表示從來未試過有兩次安哥。
事後在慶功宴上，問Twins是否擔心今次是最後一次演唱會？阿Sa直認：「係o架，所以好唔捨得。」阿嬌則說：「我經歷咗好多嘢，曾經失去好多，我冇諗過可以再開演唱會，真係要好好珍惜。」提到當年因淫照事件，祖兒要臨急頂替Twins在紅館開騷，阿嬌表示今次是首次公開多謝她，但之前已私下向她致謝。
http://hk.apple.nextmedia ... art_id=13946163
