陳敏之今次在劇集《怒火街頭》中有新嘗試，將會飾演妓女，當中不乏性感造型及具挑逗性的場面，敏之更戴了兩個bra加強效果，還希望到一樓一實地視察。首度拍無綫劇集的李璨琛則直言因角色吸引，不介意為理想貼錢打工。
無綫劇集《怒火街頭》昨日在電視城試造型，鄭嘉穎、胡杏兒、陳敏之及首次拍劇的李璨琛等演員出席，飾演妓女的陳敏之一身低胸熱褲造型十分養眼，搶去不少風頭。劇中稱為「索腿天后」的陳敏之，坦言今次將會有不少新嘗試。
敏之笑說：「我喺戲入面會有好多性感嘅服飾同埋有啲挑逗性嘅場面，仲會有一場話我裸體追賊，真係入行咁耐都未試過。雖然我睇咗好多次《我不賣身．我賣子宮》劉美君喺戲入面個角色，不過我都打算實地視察。」講到今次為這性感造型，敏之直言下了不少工夫，她笑說：「我戴咗個nude bra同push up bra，加埋我自己嗰少少先有呢個效果。」
據知此劇大部份場面會在深水埗拍攝，敏之表示已經有心理準備被人問價。對於敏之的裸跑戲，監製唐基明說：「始終電視尺度有限，所以我哋家仲諗緊會點樣拍，但係我都有聽講敏之想去見識吓，或者到時會陪佢一齊去。」雖然還未知拍攝效果如何，但已令觀眾期待。
首次拍劇的李璨琛今次將會飾演社工，問到酬勞，他說：「我平時捽碟兩晚嘅錢都多過拍劇，但係我覺得呢個角色好吸引，加上又未試過同無綫拍劇，所以我預咗呢兩個月會畀晒部劇，家又冇乜經濟負擔，所以可以為理想做啲鍾意嘅嘢。」飾演流氓律師的鄭嘉穎，今次再度與胡杏兒飾演情侶，嘉穎笑說：「我好放心同杏兒合作，因為呢個一定冇緋聞。」嘉穎也表示對《鐵馬尋橋》的成績滿意，打算相約演員食飯欣賞結局。
from:
http://hk.apple.nextmedia ... art_id=13922065
