香港人出名精甩尾，唔易俾人呃，《讀者文摘》首次公佈香港「最受信任人物」同埋「最受信任行業」排名榜，以網上問卷訪問700幾名市民，結果顯示香港人最信任嘅人係護苗基金創辦人蕭芳芳，最信任行業係消防員，而在信任榜末嘅分別係成龍同算命師，真係眾望所歸，包尾墊底。
影星成龍包尾
《讀者文摘》編輯同顧問先挑選80個名人同40個行業，再供受訪者挑選。入圍嘅包括高官、議員、藝人、運動員等，終審法院首席法官李國能排第四位，係唯一打入十大嘅高官；自稱代表香港人嘅煲呔都係排第四，不過係由尾數返上嚟，高立法會主席曾鈺成一位，衰過排第76位嘅梁振英，腳痛落台嘅董建華排73位，都好過煲呔。呢個越「紅」越不獲信任現象，可堪細味。
其他兩位下任特首大熱鬍鬚曾同唐公子，分別排第54位和56位，信任度屬中下游位置。「香港良心」陳太排第20位，八方鄰居尊子位列29，睇佢唔出原來咁信得過；成龍排第80位，搵佢做代言人嘅商品，都幾閉翳。
最受信任行業榜由救人英雄消防員、救護員包辦冠、亞軍，海關排第11位，第18位先輪到警察，在制服部隊中名次最低；醫生排第三位，律師排第15位，係專業人士中信任度最低行業。行業信任榜包尾嘅係算命師。香港教育學院協理副校長兼社會評論員莫家豪話，小甜甜爭產官司顯示風水玄學家真係乜都講得出，連法官都好大意見，市民有幾信算命師，不問可知。
可以蠢唔可以奸
信任人物榜頭10位仲包括候任中大校長沈祖堯、女探險家李樂詩、金牌運動員李麗珊同黃金寶，莫家豪指佢哋都係對社會有貢獻同承擔人物，得到信任好合理。理大應用社會科學系副教授何國良則指，市民比較信任形象正直名人，「證明可以信任嘅人，係可以蠢，但唔可以奸！」而成龍私生活惹非議，又自甘做奴才，港人點信得過佢呀！
呢段野響生果copy，真係好偏心，明明黃x民係78位，提都唔提呀！
響ming搵整個表貼出唻先！
[
本帖最後由 windmich 於 2010-2-26 16:02 編輯 ]
