■阿豪話刪除連線網址可避免手機上網。
有無諗過新春旅行？除咗要玩得開心，先達Sales建議出發前記住Set好部手機，咁至玩得放心，免得無端端收取幾千至上萬元漫遊賬單，到時神仙難救！
智能手機會自動更新
智能手機嘅功能真係乜都有，好玩之餘，囍站Sales阿豪仲話，其實WM以及Android智能機都暗藏收費危機；當中最令人「唔覺唔覺」嘅就係自動更新系統：「好多智能手機都提供天氣自動更新，雖然好方便，但萬一去到漫遊地區，佢仍然不斷幫你Update，每次會收取數據費，條數好襟計！」
Google Maps好大食
另外，好多香港人去到外國人生路不熟，都會慣性開個Google Maps搵地方玩；阿豪話咁做仲食Data，因每次開啟地圖，平均需要5至8MB，以漫遊式收費，咁就無咗幾嚿水！
另一名Sales阿K建議，臨飛前最好先將自動更新功能關閉，但因應唔同系統、唔同型號，使用方法亦有好大分別，事前最好了解多啲喇！以iPhone為例，想完全關閉數據漫遊其實好簡單，只須進入「網絡」，並將「資料漫遊」設置為關閉就可以了。
