雖然陳奕迅在無綫《勁歌》總選中完全食白果，卻無損他實際上的受歡迎程度。昨日他宣布，將於今年三月舉行的個人演唱會雖已加開了兩場，但仍供不應求，惟在原訂的第一場之前再加開一場，合共18場，正式打破自己開個唱的最多場次紀錄。
據Eason的經理人陳家瑛表示，今次加場已經係加無可加：「其實我哋一直唔敢喺第一場前面加，擔心唔夠時間裝台。不過歌迷真係不停打來公司話買唔到飛，叫我地加場，而且我哋內部都係唔夠飛，重係負數，所以同監製傾過，確定唔影響製作前提下就喺前面加埋最後呢場。」
至於Eason得悉加場後也表示好高興：「本來開17場破咗上次演唱會紀錄已經好開心，依家又多一場，梗係再開心多啲啦！辛苦晒公司同事，新年就到一定包大封啲利是畀佢哋，如果演唱會完咗Katie畀我放假，就請晒佢地去旅行，邊度都得。」不知他心裏有沒有加多句：冇上無綫宣傳又如何呢？
如果您喜歡這篇文章，請按「讚」或分享給您的朋友，以示鼓勵。
