有幸keep到個勢，長撈長有嘅Chrissie周秀娜，之前先話「咪咪要冬眠」封波，但2010一開波，又即刻開始連環吸金。上週六、日做哈林（庾澄慶）《無底深愛巡迴演唱會》嘉賓，淨係扮吓美人魚晒吓長腿伴舞，兩晚出場加埋唔夠20分鐘，已經即刻淨袋15萬嘉賓費。
後台直擊
今次伴舞主力唔騷胸、只靠露長腿，所以Chrissie黐好晒閃粉製造效果。大會仲安排咗成間房畀佢準備和休息，排場同歌神學友比一啲都唔輸蝕。
快過刷牙囉！
雖然嗰兩晚套花花裙冇乜睇頭，但跳舞時都舉高腳露吓底益街坊，加上Chrissie好專業，喺後台一邊黐閃粉一邊用iPhone聽哈林嘅歌熱身，一有時間就練舞，仲對本刊說：「我真係好緊張，唔信你摸吓我心口，喺度狂跳呀！」
出場20分鐘就袋15萬，其實附帶埋一條短片在演唱會播出，為咗喺魚缸內扮美人魚學埋潛水，又好認真咁同排舞師High King排咗4日舞。肯搏肯捱又勤力，虎年仲話要全力打入影圈兼攻日，賺到笑啦咪神！
監製話拍呢段片係想搵一個好性感嘅女星做美人魚，上年一講到性感，香港人第一時間諗到周秀娜，決定搵佢襯哈林。
今次演唱會以「海底世界」做主題，所以Chrissie都拍咗段美人魚嘅片。佢個巨咪美人魚造型，比起演唱會當晚套釘滿花花嘅連身裙有睇頭得多。
上台前超緊張，叫經理人阿Roy同佢練習。Roy捉住佢手話：「唔好緊張！鎮定啲！」Chrissie返到屋企就搵男友Avis互摸當綵排！
之前公布話Chrissie會着bra top出場、又會有個超大型嘅魚缸。但結果兩樣都冇，但當哈林唱〈春泥〉時，Chrissie伴舞時都又擘髀露吓底，又低身擠吓胸，都算識做啦。
攻日見面禮
喺香港升呢，Chrissie都學埋Angelababy去日本吸金。今期日本女性潮流雜誌《Ray》就登咗三版Chrissie嘅fashion相，仲有一版佢嘅介紹。篇文個題封佢做香港No.1o靚模，佢經理人Roy仲喺篇訪問度話：「香港嘅o靚模同日本嘅水着女有啲唔同，我哋性感都以靚為主，唔會擺啲太激嘅甫士。」
咁又係，刷牙滴雪糕喺日本嚟講都係好小兒科啫！
訪問度佢話希望可以成為長谷川潤呢類top model，仲會畀心機學日文，希望遲啲有機會演日劇。擺到明同Angelababy爭飯碗喎。
《Ray》內頁模
2010年2月號《Ray》，一連三版Chrissie 13個唔同造型，首次影日本雜誌，唔失禮。
