鄧麗欣（Stephy）、王菀之、椋名凜、高海寧等一班藝人將會參加今個星期六晚無綫《慈善星輝仁濟夜》演出，噚日喺奧海城宣傳，班藝人會表演籌款，Stephy就整甜品畀善長仁翁品嚐，佢仲話方力申都試過佢手勢。
Stephy同方力申雖然冇親口認過拍拖，但早已係公認嘅一對，近日又傳Stephy已經撇咗小方，仲話佢反轉豬肚，小方就向太子基（鄭中基）打Stephy毒針，馮仁昭試探Stephy有冇俾毒針拮到，佢笑笑口話：「冇，仲未感覺到，呢啲新聞講咗好多年，有人想金牌大風繼續攪大風，由傅穎到家都好多傳聞，我哋會好似雷頌德所講，團結對外。」到底係咪真係撇甩小方，Stephy話：「只係之前合作太多，公司想我哋試吓唔同工作發展。」
另外，四大唱片公司因版稅問題，同無綫有啲糾紛，《慈》節目監製錢國偉搵人上節目都有所避忌，佢話：「都唔關歌手事，都係跟公司指示，希望盡快解決。」
