鄭秀文前晚在紅館的第四場個唱，請來李克勤任嘉賓，克勤上台即擁着Sammi親吻一下，Sammi則挽着他作小鳥依人狀，二人合唱克勤的《月半小夜曲》。Sammi與克勤91年曾合作電視劇《浪族闊少爺》，如今克勤有妻有子，Sammi笑謂：「同我合作過嘅男星，唔係有拖拍就係結咗婚。」
克勤表示本想帶老婆盧淑儀來欣賞，但因她再度懷孕才作罷，他說：「次次你開演唱會，我就有喜，兩年前你演唱會佢就啱啱有咗，今次又中。」
原來Sammi曾送名貴床單予克勤作結婚禮物，克勤說：「你記唔記得你送過床單畀我？次次鋪張床單，我就諗埋啲唔等使嘢o架。」Sammi即叫克勤要向她道謝，克勤竟說：「幾時我借番張床單過你用吓呀？」Sammi即嘩嘩大叫：「借嚟用吓，等我發吓市，你洗乾淨先啦，唔該你……哈哈，越講越肉酸，我信咗主唔好再講呢啲嘢。」
克勤又對Sammi說：「有一年你開演唱會，我帶住女朋友嚟睇，你係咁播我哋喺劇入面打車輪啲片，你知唔知我之後幾耐冇得入房門呀？」Sammi聞言捧腹大笑。
後來Sammi返回後台換衫讓克勤獨唱，克勤無意間重提無綫與環球等唱片公司因版稅鬧翻，以致四大唱片公司旗下歌手無法上無綫節目獻唱一事，克勤說：「我本來想唱新歌，你哋知啦，我哋家冇乜機會上電視宣傳新歌……」觀眾隨即起哄，拍掌大叫以示支持，最後克勤選唱《合久必分》。
此外，前晚到場欣賞演唱會的包括梁家輝及吳彥祖，都是Sammi於電影《長恨歌》中的拍檔，而林一峰及劉美君也有現身捧場。
