現時體重105磅的李麗珍，為證明她是經典性感尤物，44歲仍夠薑騷她32C 25 32的噴血身材，還跟後輩周秀娜一樣擺出誘人牀照甫士，擺明向呢位後輩示威。
25歲的周秀娜靠剝不斷升呢，出完性感寫真又出攬枕，12月更自綁夾胸出月曆，吸乾宅男荷包。正當周秀娜在性感界橫行無忌之際，上個世紀比佢剝得更盡的性感女神李麗珍睇唔過眼，早前花個多月時間食菌瘦身，成功減去20磅肥肉，以44歲中女之齡拍攝全新噴血纖體廣告照，跟25歲周秀娜來場性戰。
重出江湖的珍妹，對嫩口周秀娜狠拋一句：「佢只不過係潮流一種啫！」暗示自己才是性感經典！反之後輩周秀娜睇完珍妹性感相後竟賣口乖：「好想同珍姐出crossover寫真集。」如果事成，宅男有福嘞！
靠剝上位的周秀娜噱頭多多，除早前為自己32D「導彈」購買百萬保險外，12月更會推出真空自綁月曆，鋒頭一時無兩。不過卻遇上性感始祖李麗珍狙擊，珍妹將把16年來令人回味的蜜桃身形再度示眾。
25歲o靚模之首
我想同珍姐一齊出crossover寫真集。（真實對白）
李麗珍減肥前有125磅，外形如同肥師奶，尤其那條31吋粗腰，更將昔日性感女神形象一掃而空，唔怪得俾人叫脹爆珍。
藐爆周秀娜
近日44歲成功減磅的李麗珍再次穿起火辣桃紅性感內衣拍攝纖體廣告，回復當年拍寫真的fit爆身形，不讓o靚模專美。珍妹坦言多年來內心都有股再現性感的想法，欠的只是一副好身材配合，「決定影呢輯性感廣告相前，我內心一啲都無掙扎過，因為我一直等緊呢個機會。俾人叫脹爆珍真係好唔甘心，既然今次有卓悅幫我減肥，男友同我個女又好支持我咁做，仲搵埋名攝影師張文華幫我操刀，令我信心返晒嚟。我唔理自己處於咩年齡，覺得想做就做。」
以中女之齡再度性感，珍妹無懼與新一代嫩口o靚模對撼，更不將宅男女神周秀娜放在眼內。珍妹說：「嗰班o靚模我無乜留意喎，淨係對周秀娜有少少印象，不過我對佢無乜睇法，亦無睇過佢本寫真。周秀娜都只不過係潮流一種啫！」
雖然珍妹藐爆o靚模，但周秀娜看過前輩李麗珍的性感牀照後，卻落足鞋油咁話：「我覺得佢好正，去到呢個年齡仲咁fit，佢呢啲先係經典，我真係甘拜下風，好想有機會同珍姐一齊出本crossover寫真集。」
眾所周知李麗珍和周秀娜一樣靠剝走紅。93年，28歲的李麗珍憑得天獨厚的清純童顏及魔鬼身形，推出全裸寫真，震撼全城，將樽頸事業推上高峰。之後又接拍《玉蒲團之玉女心經》，《蜜桃成熟時》等三級電影，穩固性感女神地位。
可惜珍妹自06年下嫁許愿便收起性感，之後誕下愛女許倚榕，身材更每況愈下。07年李麗珍由昔日「索珍」慘變「脹爆珍」，身材走樣自然輸埋信心。今年4月她出席內地電影《紅河》首映時，被問會否再拍性感相或寫真時，她反應甚大用普通話說：「神經病，小男生都要叫我阿姨，還是留點幻想空間給他們吧。」不過現任男友潘源良就睇穿珍妹不甘心做一世肥師奶，於是幫她穿針引線，接拍卓悅纖體廣告，令珍妹既有百萬酬勞，又可減肥，重拾性感尤物美譽。
本周三（18日），本刊將珍妹靚相給志偉品評，他除大讚好索外，更說有意找她拍戲，不過珍妹興趣似乎不大。珍妹說：「我無諗過任何後路，因為現階段我無意復出，我對依家新生活好滿意，除咗拍拖、湊女外，我仲讀珠寶設計，嚟緊我好想喺設計方面發展。」忽然嚟個中女性感，但轉頭又話要在設計方面發展，李麗珍果然係李麗珍，永遠估佢唔到！
