無綫台慶頒獎禮將於12月4日舉行，外傳視帝之位「柴九」黎耀祥十拿九穩，無綫親生仔鄭嘉穎得一套《烈火雄心3》爭視帝，個勢真係弱好多。不過鄭嘉穎似乎仍未打定輸數，本周一（9日）四面佛誕，佢專誠飛去曼谷拜神，日頭人多插針插唔入，惟有傍晚再去誠心跪拜。
鄭嘉穎花咗成千蚊買咗一盤大祭品拜神，內有4隻代表權力及財富的「護佛象」。據知普遍拜四面佛花50蚊買祭品已足夠，但若信眾有較難達成嘅願望，則要買權力象供奉。鄭嘉穎除咗爭獎贏面低，早前又被阿佘狠飛，去大馬宣傳被問及緋聞又被指黑面發老脾。諸事不順，難怪鄭嘉穎要落重本拜四面佛。
互動片段
鄭嘉穎豪買權力象拜四面佛
拉姑關菊英拜四面佛
唔講你知求咩！講咗唔靈o架！（真實對白）
本周一（9日）是四面佛誕，曼谷的四面佛非常熱鬧，除了有四面佛超級VIP拉姑率領關菊英、陳淑芬等人朝聖外，今年仲有鄭嘉穎同王賢誌呢對表兄弟。
當日清晨6點，拉姑拜佛團已到達四面佛，現場有逾500信眾參拜，人山人海。身穿白衫白褲嘅鄭嘉穎，一直站在表弟王賢誌身後。雖然在拉姑的關照下眾人即時成為普通VIP，但到6點半儀式開始時，只有超級VIP拉姑及老公鬍鬚Kong可以排頭位上頭炷香。
眼見現場環境非常混亂，鄭嘉穎等人只匆匆向四面佛上了一炷香便返回下榻的Grand Hyatt酒店。以為鄭嘉穎只湊熱鬧，但原來他心有所求，更在當日傍晚6時獨自再去誠心拜佛。
11月9日
清晨6點日拜
本周一（9日）晨早6點，鄭嘉穎與表弟王賢誌（右）跟隨拉姑到曼谷四面佛，睡眼惺忪的鄭嘉穎只係普通VIP（綠色章），未能站在最前排。儀式後他匆匆上了一枝香便返回酒店。
買權力象供奉
鄭嘉穎當時買了一盤祭品（右圖），內有4隻代表權力的護佛象，祭品由當地一名泰籍女員工捧着。鄭嘉穎在女員工的指導下拜四面佛。
雖然夜晚比日間少人，但香火仍然鼎盛煙霧迷漫，鄭嘉穎拜到滿頭大汗，仲被香火攻到眼都睜唔大（右圖）。
據知權力象是四面佛的助手，可助善信求財富、地位及智慧，鄭嘉穎小心地把象放在適當的地方供奉。
聘泰妹跳舞
完成拜祭儀式後，鄭嘉穎再花了約200港幣，請身後8位傳統女舞蹈員跳一分鐘的祈願舞，鄭嘉穎（圈）全程跪下合十，好有神心，之後他便返回酒店休息。
搵專人指導拜神
晨早去完拜四面佛，王賢誌下午在Grand Hyatt的泳池旁曬太陽，傍晚再沒有陪表哥鄭嘉穎去拜神。
鄭嘉穎到達後第一時間搵四面佛駐場員工幫手，他花了約4,000泰銖（折約港幣1,000）買了一大盤祭品，內有七彩鮮花串、香、金箔及四隻「護佛象」。他在一名泰籍女員工指導下順時針向四面佛逐一參拜，每到一面都跪下求神，雙目緊閉口中唸唸有詞，非常認真。拜神後鄭嘉穎再花了770泰銖（折約200港幣），走到佛旁的「泰式live band」，請了8位舞蹈員為他跳祈願舞。
記者向曼谷四面佛的員工查問，得知普通善信花200泰銖（折約50港幣）買一套祭品拜神已經足夠。該員工說：「如果善信有大願望或者係較難達成嘅願望，就要買4,000泰銖（港幣1,000）嘅祭品，而祭品內要有泰式大象。因為象喺泰國代表財富同智慧，係四面佛嘅『護佛象』，代表權力。至於搵舞蹈員跳泰式祈願舞同還神舞，係要表達善信嘅誠意，誠意愈大，往後四面佛加持嘅福報也會愈大。」
望是非遠離
據知鄭嘉穎呢次咁誠心，原來為了掃走最近黑氣。知情人士透露：「嘉穎早前同阿佘甩拖已經是非多，又俾人話黑面態度差，搞到佢心情唔多好。今年佢得一部《烈火雄心3》爭男主角，但柴九呼聲咁高，佢知自己冇運行，惟有寄望以《宮心計》高顯揚一角爭『我最喜愛的電視男角色』啦！總好過咩獎都冇。今次佢專登喺台慶前去拜四面佛，希望一次過轉運，是非遠離佢，話晒都40歲人，依家唔搏等幾時呀？」
感情冇著落
在最近熱播的《宮心計》中，鄭嘉穎飾演的高顯揚與阿佘飾演的劉三好都算係男女主角，不過鄭嘉穎竟然冇分憑呢個角色爭視帝。反而年初的《烈火雄心3》就入圍，不過贏面好低。
早前有傳鄭嘉穎被佘詩曼狠飛後，想翻兜周麗淇。本周二晚（10日）09無綫節目巡禮安排鄭嘉穎與阿佘拖住出場，不過鄭嘉穎全程木無表情，與阿佘眼神零交流，扶完落樓梯即各行各路。
鄭：信佛已兩年
對於去曼谷拜四面佛，鄭嘉穎本周二晚（10日）出席09年無綫節目巡禮時就承認信佛兩年。
記：記者 鄭：鄭嘉穎
記：星期一喺曼谷見到你拜四面佛喎？
鄭：係呀，信咗都有兩年，今次因為佛誕所以過去拜，年初仲試過朝早飛去拜，下午飛返香港㖭。
記：求啲咩呀？攞視帝定求姻緣？
鄭：都係身體健康啦！
記：但係你買嘅祭品好貴喎，普通人用幾十蚊港幣，你嗰啲要千幾蚊？
鄭：我都係跟拉姑去拜，佢哋買咩我咪買咩囉！
記：祭品中有代表權力嘅象，係求啲難達成嘅願望。你求啲咩呀？
鄭：我唔講得你知o架！講咗出嚟唔靈o架！
拜完四面佛，鄭嘉穎成個人唔同晒，回應記者提問時態度友善，有問必答。若然佢今次願望達成，記得返去還神呀！
四面佛有求必應
四面佛是婆羅門教三位神明之一，四面為慈、悲、喜、捨。娛樂圈中不少藝人和名人均是虔誠信徒。拉姑篤信四面佛四十年，有說她初出道時曾為事業求拜四面佛，並於四面佛前跳裸舞。拉姑走紅後，每年也返回泰國答謝神恩。
拜四面佛基本要預備貢品4份（包括花串、金箔、香及蠟燭），善信要先將花或花串連同四塊金箔交給四面佛壇的泰籍員工，員工會助善信擺花和貼金箔，之後順時針方向逐面參拜。每拜一面便點一支蠟燭，再點着全部香。由正面開始跪拜，跪拜時要稟報自己的姓名、出生日期、居住地及心願等，然後順時針上香，最後化寶。如向四面佛許了願，一定要還神。
拉姑上到頭炷香
每年四面佛誕（11月9日），拉姑都會率領為數幾十人的拜神團到曼谷。今年都唔例外，不過往年有份的蘇絲黃與密友金燕玲就唔見影。拉姑同老公鬍鬚Kong都係超級VIP（紫色章），基本上VIP分普通（綠色章）及超級VIP兩種，只有超級VIP才可以在儀式後上頭炷香。
除了專誠去曼谷拜四面佛外，拉姑每次都會相約好友嘉玲到她下榻的Grand Hyatt酒店茶敘。
鄭嘉穎下重本拜四面佛力求掃除衰運兼求獎
無線台慶頒獎禮將于12月4日舉行，外傳視帝之位“柴九”黎耀祥十拿九穩，無線親生仔鄭嘉穎只有一套《烈火雄心3》爭視帝，聲勢弱好多。不過鄭嘉穎似乎還沒准備認輸，本周一(11月9日)四面佛誕，他專程去曼谷拜神，白天人多擠不進去，晚上再誠心跪派。
鄭嘉穎花了近千塊買了一大盤祭品拜神，內有四只代表權利及財富的“護佛象”。據知普遍拜四面佛50元已經足夠，但若信衆有較難達成的願望，則要買權利象供奉。鄭嘉穎除了爭獎贏面低，早前又被佘詩曼甩掉，去馬來西亞宣傳被問及绯聞又被指黑面發脾氣。諸事不順，難怪鄭嘉穎要下重本拜四面佛。
