科大早輪邀請周秀娜擔任分享嘉賓，掀起一陣熱話，理大有樣學樣，請來另一o靚模，有E Cup Baby之稱嘅性感o靚模劉欣宜，會同大學生分享時下年輕人愛情觀同兩性關係。但抱住睇肉心態參加分享會嘅朋友，相信會有啲失望，事關劉欣宜講明唔會着得好性感赴會。
上回周秀娜勇闖科大，毀譽參半。今次嘅主辦單位理大應用社會科學系系會幹事蔡同學話，佢哋冇打算研究o靚模嘅intensive moment，亦唔需要E Cup Baby梳理自己，現場唔會用英文測試o靚模。
劉欣宜就叫理大師生即管放馬過來，佢平時英語訓練有素，一般對答絕無問題。喺邊度訓練呢？Baby話平時勁唱英文卡拉OK，所以英文好骨。
講師都想聽聽
理大應社系講師崔日雄話有興趣聽吓個talk。佢認為請o靚模入大學講talk冇壞，不過最怕參與嘅同學另有居心，令到分享會變做一場吹捧o靚模嘅show。
