暑假過後o靚模熱潮迅速降溫，只有少數人有得留低。周秀娜師妹蔡穎恩（Evelyn）繼益力多和Canon廣告之後，近日再獲邀為萬寧拍攝潤唇膏廣告，證明成功並非露吓肉咁簡單。已回歸校園的她，更謂暫時無意學師姐周秀娜進軍東瀛市場，但希望可作不同嘗試，最好能在電影中演奸角挑戰自己。
蔡穎恩暑假期間與同公司的o靚模組成8模兵團，推出寫真集之餘，也出席宣傳活動，爭取曝光機會賺錢，暑假結束後，仍是學生的Evelyn回歸校園，只能趁課餘時間兼職，早前她就拍攝了一個潤唇膏廣告。
穿運動服的Evelyn在烈日下拍廣告扮網球比賽球證，風吹日曬也毫無怨言。
拍攝當日Evelyn身穿運動服，在中環一碼頭的天台取景。扮演網球比賽球證的她，坐在高椅上不斷邊搽潤唇膏邊左擰右擰，雖然當日陽光猛烈，不過因海風不斷，故Evelyn也不算太辛苦。事後她接受訪問時說：「有風都唔算辛苦，反而吹亂晒啲頭髮就比較麻煩。我覺得呢個sporty打扮都幾襯自己，雖然細個有約略學過網球，不過我打羽毛球叻啲。」提到師姐周秀娜簽約日本經理人公司準備進軍東瀛市場時，Evelyn說：「其實我家仲係讀緊書，仲有一、兩年時間，所以我想暫時留喺香港，畢業先再決定。」o靚模淘汰率極高，問到Evelyn會否擔心時，她說：「都冇得話擔心，呢個係自然定律。」
周秀娜憑魔鬼身材上位，近日更簽約進軍日本市場。
Evelyn暑假過後已回歸校園繼續學業，向來不走露肉路線的她仍有接拍廣告賺外快。
Evelyn又表示有意作不同嘗試，她說：「希望可以有機會試多啲唔同嘅look，畀多啲新鮮感大家，如果有機會最好可以扮壞人或者奸角，因為除咗難演繹之外，仲因為現實生活入面唔會做到衰人囉。」採訪：藍文浩 攝影：林德雄
