[生肖曆數] 農曆八月：音樂盒化病氣

蘇民峰玄學GOOD蘇

身體健康好重要，冇好嘅體魄點去搏！踏入農曆八月(由西曆9月19日至10月17日)，揾定個上鏈音樂盒嚟減病氣啦！

正東．放一杯水：
今年正東為「七赤金」，但係今個月呢個方位為「五黃土」，「金」能洩「土」，減低病氣，並可放一杯水催財。

東南．唔使擺：
今年東南方為「八白土」，今個月呢個方位係「六白金」，「六」「八」相遇，有利升遷。

正南．放紅色物件/音樂盒：
今年正南為「四綠文昌木」，而今個月呢個方位係「二黑土」，「木」遇「土」交戰，如果肺、喉嚨、氣管出現問題嘅話，可放上鏈音樂盒化解，以洩「土」制「木」；而腹部、腸胃出現毛病或不適，則放紅色物件化解。

西南．放一杯水：
今年西南方為「六白金」，今個月呢個方位屬「四綠木」，「金」「木」交戰，易見損傷，想再化衰氣，可放一杯水。

正西．放音樂盒及一杯水：
今年正西為「二黑土」，而今個月呢個方位為「九紫火」，「火」生「土」但亦會生旺病星，宜放音樂盒及一杯水化解。

西北．放音樂盒：
今年西北方為「一白水」，今個月呢個方位屬「八白土」，「水」「土」交戰，放音樂盒即可化解。

正北．放音樂盒/紅色物件：
今年正北為「五黃土」，今個月呢個方位為「三碧木」，木土交戰，如肺、喉嚨、氣管出現問題，可放上鏈音樂盒化解，以洩「土」制「木」；而腹部、腸胃出現毛病或不適，則放紅色物件化解。

東北．放紅色物件：
今年東北方為「三碧木」，今個月呢個方位屬「一白水」，「水」生「木」旺，更旺爭鬥，要放紅色物件化煞。

中宮．放石頭：
今年中宮為「九紫火」，今個月呢個方位屬「七赤金」，「火」旺剋「金」，不利肺、喉嚨、氣管，可放一顆石頭化解。