被形容為幸福準新娘嘅徐淑敏（Suki），噚日同前緋聞男友崔建邦到太古城中心出席美食活動，可能佢哋各自有另一半，所以都冇特別避忌，喺台上有傾有講。被指奉子成婚嘅Suki噚日着上一條火紅連身裙示人，不過平日身形弗爆嘅「咪神」噚日腹部微隆，加上佢上落樓梯又要助手攙扶，現場見佢幾抗拒食生冷嘢，唔知Suki係唔係怕BB小器，所以佢仍然唔認有咗，佢話：「到時有咪知，唔排除有小朋友，相信我有BB時，大家都會祝福我，自己冇驗過（指驗孕）。」
徐淑敏噚日腹部微隆，可能佢怕ＢＢ小器而唔認有喜。
要未婚夫落廚Suki話做完手頭上嘅工作就會休息，每當提到佢未來老公同年底嘅婚禮時，佢就會流露出幸福滿瀉嘅笑容，佢話：「係呀，終於畀我等到，之前冇拍拖成年，好悶。」Suki喺活動上落手落腳切嘢，仲顯得有板有眼，不過佢話自己平日唔多下廚，反而係未婚夫煮嘢食居多，佢話：「我諗佢情願同我出街食多啲，因為佢嘴刁，等我練好啲廚藝先。」
