椋名凜（Rin）同胡心諾（Rainbow）噚日着住日式浴衣現身銅鑼灣推介新電玩遊戲，經過一輪動作示範比拼，扮日本妹嘅Rainbow竟然打敗真正日本妹Rin，奪得可愛造型動作大獎。前日周秀娜當眾俾人爆粗性騷擾，Rin話完全唔知呢件事，若果係佢俾人性騷擾會好嬲，因為感覺受辱。佢覺得件事同周秀娜太性感有關，佢話自己就視乎工作需要先性感。講到周秀娜有冇AV味道，Rin話：「都有少少。」至於佢同周秀娜比較邊個性感啲，佢就話：「自己係時裝模特兒，周秀娜係水着女郎。」
Rin雖然着咗浴衣包到實，但係依然用眼神向身旁男士狂放生電。
周秀娜（圖）日前俾人公然出口性騷擾，椋名凜話佢直情有日本AV女郎feel喎。
Rainbow就認為出言性騷擾嘅男人係表達個人意見，不過揀錯方法、場合。問到覺唔覺係攬枕同性感寫真令人瘋狂，佢重申攬枕同刷牙相係好好嘅商業橋段，係啲人諗得唔好啫。佢唔擔心自己出席活動被性騷擾，同樣都視乎需要而繼續性感，佢仲話：「自己賣青春，周秀娜就賣身材。」
