自知身材輸o靚模成條街，鄧麗欣（Stephy）走位博升呢做才女，推出愛情小說《陪著我走》，可惜30頁深情文章，有成109粒錯字，認真丟架！
其實Stephy得中五畢業，會考中文科只係攞E（1分）僅僅合格，才女做唔成，「屎上最強」卻當之無愧！
濕滯「才」女
Stephy 歷年嘢唔少，好辛苦先搣甩「鄧走音」之名，諗住出小說做吓才女以濕身三點式做賣點，講真啲相質素可觀，可惜文字卻不堪入目，而金牌CEO陳輝虹就話：「佢呢本唔係小說，係寫真日記，我哋從來冇話過呢本係小說呀！」吓？寫真日記唔通就可以畀你錯足109粒字咩？
群插群力
鄧麗欣作品錯漏百出，1分才女全城圍攻，除咗網友群插，連演藝文化界都出聲話Stephy錯字連篇好難原諒，一人一句插到你傻。
除o靚模出寫真氣勢強，今年書展，以Stephy同傅穎（Theresa）出愛情小說做才女最多人講，Stephy首次濕身三點式影靚相，以為可橫掃書展攞晒彩。
模擬成績單
中文E
英文E
美術C
歷史D
經濟D
會計E
9分
00年考會考的Stephy，只有9分，中、英文都只係僅僅合格，所以著作冇專人幫佢做好校對，即瀨嘢。
最大笑話
Stephy 前年首次出書做才女，2年未出過事，點知今年諗住搞突破，用三點式包裝兼加入30頁以愛情為主嘅小說文章，書展頭一日（23日）係威係勢，叫晒近百fans打鑼打鼓，點知第二日就發現才女大作錯字連篇，成為書展史上最大笑話。查實唔係第一次出書晒文筆嘅Stephy，讀書時中文其實好一般，據知佢00年於band 2嘅屯門佛教聯合會中學中五畢業，早年有網友話佢未入行專溝屯門屋邨仔，有「瘟仔王」外號，更公開承認會考得9分，中文仲只係攞E僅僅熟，之後讀IVE時裝及紡織系，不過讀咗一年就入行！
錯字事件發生，話鍾意睇哲學家尼采嘅Stephy一時話：「平時用手寫板，今次好趕，用國語拼音打字，點知揀字時揀錯。」又話：「係一時疏忽同太倚賴校對。」，連金牌大風發言人陳小姐都將隻鑊卸畀「隱形」助手話：「因為時間太趕，所以同事先攞錯咗個未校對版本印，我哋已經內部處分咗啦！」其實有錯字都可以有文采，老實話自己識字少，會努力改進好過左推右賴，乜尼采唔係叫人自強咩？
出書咪求其
Stephy今次本大作由影相到校對都係由自家公司金牌大風製作及印刷一手包辦，大眾書局只係負責發行，不過就超蝦碌，反而為周麗淇出書嘅bma就未試過咁大鑊，新任金牌CEO陳輝虹真係要向bma老闆娘梁芷珊學吓嘢啦！
審四次
作家兼bma老闆娘梁芷珊表示：「我要求藝人最少早一個月寫好作品，之後就會畀中文系碩士畢業嘅編輯做編輯及校對，之後再交畀藝人覆審，如果冇問題排好版，會再交畀藝人作最後審閱，ok先印嘅！」
攞錯版
負責Stephy新書《陪著我走》出版嘅金牌大風CEO陳輝虹話：「由於相太多，為方便控制所以自己做埋出版，因為揀相問題，到出書前最後一分鐘先印，所以公司同事攞錯個冇校對版本印，先有咁嘅問題！」
Stephy睇得開
Stephy 連日俾人隊，喺週日（26日）就發表咗一篇名為《世界末日》嘅文章，淨睇名以為佢覺得錯字單嘢好大件事，但睇真啲個內容，原來啱啱相反，據臨床身心行為學家李寶能話：「我覺得佢呢篇blog雖然標題係世界末日，但內容上其實Stephy相當豁達，佢已經唔在乎人哋對佢嘅批評。超越咗執着。佢唔會再為啲報道唔開心。」鄧才女真係灑脫喎！
書展星模大亂鬥
今年書展競爭激烈，o靚模水着要搶食，連升呢傅穎都要諗吓計，大家目標一致，就係榨乾班宅男水，儲齊咁多本女神出品就要科水$1,459.9，最慘係今週又到動漫展，出雙糧都唔掂呀！
傅穎吹雞
見「好姊妹」Stephy錯字出書變笑話，Theresa食住個勢踩住上，除第一日（22日）叫過百fans打鑼打鼓撐場造勢，網上就發現佢出招送簽名閃咭，叫大批fans喺星期日（26日）第2場簽名會撐女神。至於o靚模周秀娜（Chrissie）同羅凱珊（Kama）勝在夠搏，送奶獻吻答謝fans，一人一招間中互彈兩句，為餐食，籠裏雞都要作反啦！
層層叠吹雞
Theresa於第一次簽名會後即喺fans網上呼籲，叫fans出席第2場（星期日26日）簽名會，並指到場即可獲女神簽名閃咭，大家都係派嘢，不過傅穎話：「我唔會好似佢哋派雪糕嘞！」
Theresa fan club會長Maggie即時打電話及於網上急call粉絲，點齊人頭帶埋poster及橫額晨咁早到會展簽名會場練習嗌口號。
Theresa兩場簽名會都有過百名粉絲撐場，係藝人同o靚模中最多人支持嘅一位。
Chrissie慳錫
雖然周秀娜（Chrissie）粉絲唔夠女神傅穎多，不過佢勝在夠搏，除咗喺金紫荊廣場熱到濕身派雪糕，又事先張揚會錫錫男fans，點知去到現場隔住塊透明膠片，現場即刻噓爆，不過一樣有fans珍而重之袋埋塊片，仲話：「都預咗，唔通真係錫咩。」
Kama灌奶
見死敵派雪糕引仔引傳媒，羅凱珊（Kama）有樣學樣，不過今次佢就派鮮奶，結果一樣係爭崩頭，為表忠心，其中一名男粉絲仲即時全支啪晒，平時阿媽叫飲奶又唔見咁聽話！
Baby好賣
銷量最好賣清2萬本嘅Angelababy，週日（26日）書展水尾先踩場簽名，避開堆o靚模，更請咗兩位外籍保安貼身護駕。出席完簽名會仲落《明報》counter踩場。男友陳偉霆雖然冇去為女友加油，不過喺《竊聽風雲》記招，聽到吳彥袓寸Baby唔夠高，佢即時還擊：「佢（Baby）高過你喎！」歪曲埋事實，撐硬你。
「掟書男」出手 陳總笑戰蕭若元
週日（26日）陳志雲為新書《志雲首選食府》簽名會，竟被一名扮書迷排隊的「四眼男」忽然發難，向其掟書兼臭罵。扮過花旦唱過戲的陳總，一樣處變不驚，仲對「四眼男」回禮：「咁你仲要唔要番本書㗎？」陰陰笑EQ高。高手過招，不過好戲陸續嚟，事關「香港人網」（
http://www.hkreporter.com）搞手蕭若元話已經攞足證據，搵齊一班學者諗住去信廣管局，正式告無綫壟斷。蕭才子大戰志雲大師，呢場戲有排睇！
繼714在廣管局公聽會遭「滷味男」狂罵後，週日陳總在書展一樣俾另一「四眼男」圍攻，大鬧：「你無恥！垃圾！」據知該「四眼男」為「香港人網」網民，網名為Democracyfans。陳總處變不驚，全因「夠晒經驗」，事關由六月底開始，三場本地免費電視節目服務牌照中期檢討公聽會，陳總已領教過「香港人網」動員的「威力」。
其實一班「人網」網民一直都針對無綫新聞做法是但，加上壟斷電視業，迫藝員一年簽一騷，一眾網民就自發性到公聽會現場表達訴求，上週五（24日）第三場公聽會，「滷味男」再現身，大鬧陳志雲係小人同太監。多次衝擊陳總，有傳背後搞手是「人網」創辦人蕭若元，除趁機圍剿陳志雲外，亦可為「人網」省靚為人民發聲招牌。蕭才子本週一對本刊說：「我冇叫網民去踩場，佢哋係自發性咁做，我已經收集好證據，搵緊一班學者，去信廣管局告無綫，希望電視界可以公平啲。」
《亂噏》抽志雲水：等同胸襲鄭融
「香港人網」網民行為激進，多次衝擊陳志雲，惹來其他人覺得「香港人網」有借「陳總」個名抽水之嫌。不過蕭若元就話：「我唔明咩叫『抽水』喎！我哋只不過係表達我哋對廣管局不滿。我冇叫人去陳志雲度踩場！」而一向諷刺開陳志雲同無綫嘅亞視節目《香港亂噏》，最近加插新環節「垂簾聽打」，直頭由林超榮影射六嬸「芳太后」、盧海鵬做「志暈大師」。陳總是非多，《香》又會唔會再加料？主持之一兼創作大腦林超榮就話：「喺公聽會表達絕對冇問題，但掟書呢個行為就唔得囉，好冇禮貌，等同胸襲鄭融一樣。至於會唔會加插呢個gag，我哋會傾吓！」- (id:kenwchch)
