憑奇招「露暈娜」成功上位的o靚模周秀娜明天率先在書展中舉行首次簽名會，宿敵32B的趙碩之師妹Melody（陳若嵐）昨日揶揄周秀娜的寫真集宣揚不健康訊息，Melody賣花讚花香，指她和Yumi（尹蓁晞）的孖妹寫真集《My Yumi My Melody》正氣可入屋。
「刷牙刷到一身係」Melody昨日狠批周秀娜的寫真，她說：「公眾人物要有社會責任，雖然話唔係教科書，但如果大人買咗返屋企，小朋友睇到會有樣學樣，刷牙刷到一身都係，我認為藝人必須做好自我監察。我哋嘅寫真集都有着比堅尼，但背景唔係沙灘就泳池，着得好合情合理。」
此外，Melody也反對少女輟學加入o靚模，明顯針對年僅17歲、被爆遭踢出校的Rainbow（胡心諾），Rainbow仍未完成中四課程，連比堅尼的英文都串錯，Melody勸喻說：「讀書唔使好叻，但基本最好完成中五課程。」
