成也o靚模，敗也o靚模。o靚模熱潮席捲全城，顛覆模界，卻又引起網上大聯盟反對o靚模入侵書展。本地名模前輩對o靚模殺入書展，意見中立兼體諒o靚模，但促請o靚模要收斂衣着。經常與女兒一同出席活動的馬詩慧，則堅決不會讓兩女做o靚模，她昨日說：「我係中立，冇話反唔反，都係一個行業，一個稱呼。其實唔使去到書展先有（o靚模寫真），報紙、雜誌成行成市啦，兩個Fcup都霸晒啲頭條。」
歐陽妙芝言談間對o靚模被針對大表同情，她說：「職業無分貴賤，o靚模都係一份工，着比堅尼都係職業需要，唔好白眼人哋。o靚字代表年少無知，呢個係一陣風，夏天啲人就想赤條條，佢哋都冇乜影響人。書本係有唔同範疇，要管書展都應該由主辦單位去管，唔應該由網民去管。」琦琦說：「出書即係有fans，有自己市場，社會係容納唔同聲音，但書展有好多中學生，小學生，唔好着得太性感。」
