傅穎遭騙情鄭中基頭號嫌疑

書展生死鬥將於22日一觸即發，傅穎（Theresa）為迎戰一眾(o靚)模及死敵鄧麗欣，不惜自爆曾遇上圈中愛情騙子，暗示被騙色騙心，事後對方更「反轉豬肚」，令她傷心欲絕，傳要踢走Theresa的鄭中基，頓成為頭號嫌疑犯！

昨日Theresa以女神look出席「夏之盛放—傅穎女神篇」活動，面對(o靚)模氾濫娛樂圈，Theresa為求出位都要「紆尊降貴」，穿了tube dress的她坐在地上扮打機，讓一班攝記和龍友「高炒」影相，幸沒有走光。

秘密拍拖未被踢爆

Theresa 將於22日（下周三）推出繪本散文集《我會快樂的》，她在書中自爆曾遇上圈中愛情騙子，由於她曾與方力申和城中富豪林公子傳過緋聞，昨日Theresa被記者追問時拒絕公開對方身份：「唔可以講。（係咪方力申？）唔係。（林公子？）佢都唔係圈中人。」問有冇與他合作過拍戲？Theresa支吾說：「唔知，反而多謝呢個男仔，令我有靈感寫書，我冇嬲佢。（佢呃你感情定金錢？）識佢前後兩個人，算啦，過咗去。」問有冇蝕底給對方？Theresa面紅紅說：「死啦，唔識答。」

Theresa 拒透露愛情騙子的資料，只表示入行後認識對方，兩人秘密拍拖沒被傳媒踢爆，故沒有與他傳過緋聞，亦不是同公司的藝人，但現在仍有機會見面，她說：「嗰時好傷心，但佢令我成長，上了人生寶貴一課。（衰劈腿？）男仔最唔應該呢樣，三心兩意，我唔鍾意人講大話，虛有其表。」

不否認緋聞做賣點

記者翻查資料，曾與Theresa合作過電影的男藝人有余文樂、鄭中基、方力申、王祖藍、側田、徐天佑、李逸朗、古天樂等，芸芸嫌疑名單中，以鄭中基最脗合，事關有傳鄭中基要將Theresa踢出金牌大風，符合她口中「識佢前後兩個人」的貼士，雖然她指對方不是同公司藝人，但令人懷疑只是故弄玄虛。

而Theresa接受有線訪問說：「識佢前好好，畀我覺得有才華。」有才子之稱的倪震亦成為嫌疑人物，事關倪震曾幫Theresa新書寫序，兩人曾傳緋聞，而在倪震啜女事件發生後，Theresa表示不會再找他寫序。

不過，由於Theresa的貼士模棱兩可，亦令人懷疑是否真有其人，還是Theresa宣傳新書的招數，問她新書是否以緋聞做賣點？Theresa冇答，只說：「希望大家多多支持。」對於死敵鄧麗欣在新書中以水着上陣，Theresa說：「我冇三點式，只有生活照。（咁咪好輸蝕？）我都唔係出寫真集。」

至於傳金牌大風拖糧，Theresa表示：「我又冇，上個月嘅支票已收到。（傳會炒雷頌德？）太多新聞，自己都係被炒一個，唔理。」此外，早前Theresa幫樂壇新人袁子皓拍ＭＶ，一樽水兩份飲扮sweet，踩單車時還幾乎仆在對方身上，差點嘴對嘴。

傅穎（Theresa）至今共拍過15部電影，和不少男星合作過，究竟誰是她口中所講的愛情騙子呢？

鄭中基

嫌疑指數：★★★★★

原因：曾5度合作，包括《龍咁威2》、《至尊無賴》等搞笑爆肚之作，加上二人同公司，朝見口晚見面之下難免生情。

冧女絕招：貴為公司太子，有財氣，而且風趣幽默，唔會悶親女友。

余文樂

嫌疑指數：★★★★

原因：脫離Cookies後首度拍電影《百分百感覺2003》即遇上花弗型男樂仔，在入世未深加上同片沒有其他俊男下，Theresa隨時誤墮情網。

冧女絕招：有型有款，識氹女仔，加上孝順形象，少女們有咩辦法唔嗒糖。

李逸朗（Don）

嫌疑指數：★★★★

原因：兩人07年合作《校墓處》，首度拍恐怖片的Theresa容易被氣氛嚇怕，Don自然可出面護花，令她心生好感。加上Don擅於彈結他，可幫唱功有待改善的Theresa伴奏練歌。

冧女絕招：形象乖仔健康，而且屬文靜型，文質彬彬加上識彈結他，絕對有吸引力。

方力申

嫌疑指數：★★★

原因：06年內已合作《獨家試愛》和《戀愛初歌》兩部浪漫片，浪漫氣氛下容易生情，加上兩人同公司，容易日久生情。

冧女絕招：靚仔有型，而且是游泳健將，充滿陽光活力，唔冧死女至奇。

吳京

嫌疑指數：★★★

原因：兩人合作拍《黑拳》，片中吳京盡顯身手，而當Theresa性感出席宣傳時吳京更為她充當保鏢，安全感十足。

冧女絕招：打得睇得，有吳京做男友一定唔使驚畀人蝦。

王祖藍

嫌疑指數：★★

原因：06年合作《獨家試愛》時祖藍仍未當紅，但同樣風趣識氹女仔，加上祖藍外形不算突出，令Theresa對他零戒心，造就祖藍有機可乘。

冧女絕招：風趣鬼馬，有令女仔笑唔停的伎倆，自然大受歡迎。

側田

嫌疑指數：★★

原因：06年合作《戀愛初歌》，側田片中大騷歌喉，而且飾演怕醜仔一名，角色討好，側田還可趁空餘時間教Theresa唱歌博好感。

冧女絕招：有音樂才華，而且能作能唱，容易吸引異性目光。

古天樂

嫌疑指數：★

原因：兩人於喜劇《家有囍事2009》中合作，拍攝時搞笑輕鬆的氣氛，加上古仔的一雙電眼，Theresa少點定力就會即時上釣。

冧女絕招：有型靚仔加上擁有一雙電力十足的眼睛，不費吹灰之力已能電暈眾女。