趙碩之、戴夢夢和尹蓁晞（Yumi）昨日出席屯門市廣場的美容店Pretty House分店開幕活動，雖然三人均收起性感，但仍搶去該店代言人李潔瑩（Nicole）及橋詰麻衣風頭。忽然密實起來的趙碩之，更被戴夢夢踢爆欺負小師妹Yumi。
趙碩之（左）收起性感，惟有與戴夢夢（中）及Yumi姊妹互篤搶鏡。
原來三女因擔任動漫節大使，最近密鑼緊鼓排練所唱的主題曲歌舞，夢夢踢爆說：「Yumi跳到腳抽筋，Wylie（趙碩之洋名）都唔理佢，仲嫌佢阻碇。」趙碩之聞言即緊張地解釋：「唔係唔理佢呀！我要澄清冇蝦佢㗎，大家都想進度快啲，佢坐咗喺中間又唔郁，阻住我哋跳舞，咪想搬開佢囉。」夢夢再搶位說：「Yumi隻腳板跳到黑晒，但我都用自己隻玉手幫佢按腳板鬆筋，我呢個師姐真係唔話得！」
趙碩之見無從辯解，即時拉開話題說：「我有跳舞底子，不過今次佢哋話我跳得好硬，好似打功夫咁，我會拍Yumi一齊跳，動作都好性感。」Yumi不爭氣還自認是跳舞白癡，她說：「我跳舞真係冇天份，會努力去練習，不停跳，點知跳到腳抽筋，我都唔係想阻住，因為隻腳唔郁得，至會坐咗喺中間。」
