2009年07月10日近期o靚模好似坐過山車咁，由幾個月前被全城熱捧，到近日被網民群起攻擊，揚言要o靚模滾出書展。而o靚模愈出愈多，競爭自然激烈，多是非唔在講，仲引起唔少女星對呢班只識拋胸嘅女仔不滿，令o靚模界面對內憂和外患。
向來被歸納為o靚模一分子嘅椋名凜，就否認自己係o靚模，為證明自己係真正嘅模特兒，椋名澟喪插o靚模只識除衫博出位，完全冇模特兒經驗，最多只可稱為「水着女」。
椋名凜寸語一出，o靚模代表Rainbow（胡心諾）同Lavina（鍾蕙芝）即時反擊，Rainbow更明寸椋名澟年紀大，唔知o靚模係潮流。
來自日本的椋名凜以性感和驕人的上圍，在香港市場打出名堂。視自己為模特兒的Rin雖被歸納為o靚模，但她強烈否認自己屬於這群。
椋名凜近日被網友翻挖舊史，指她多年前曾以原田志乃之名，推出過一本名為《Escape》的全裸寫真，並以$13.6賤賣。另外，椋名凜為了來港發展，知道自己年紀大未必能打入市場，所以將原本年齡33向外虛報只有26歲，雖然椋名凜一一否認，但呢堆負面新聞的確令她人氣急升。
Rainbow好姊妹Lavina亦寸椋名凜：「有人為咗出位雙手掩胸都得啦！」
17歲的Rainbow因與方力申傳緋聞上位，青春和性感令她成為宣傳活動的首選。對椋名凜寸o靚模只懂除衫，她即忿忿不平。
升格拒做o靚模
被指扮o靚模的椋名凜沒有為負面新聞動氣，雖然沒攞出真憑實據，卻堅決表示「我冇報細數，今年真係26歲。」更借勢拒認自己係o靚模：「我係有影過寫真，不過唔係全裸。01年我喺日本影寫真，係以GravureIdol（水著偶像）身份去拍，完全唔可以叫模特兒。之後我努力做嘢，拍劇唱歌去upgrade自己。到依家我有catwalk騷行，又做迪士尼泳衣代言人，咁先可以叫做模特兒。我都唔明點解有啲女仔為出位會不請自來，為博影多幾張相走出嚟除衫。」椋名凜這番言論明顯直指近日以性感上位的Rainbow（胡心諾）、Lavina（鍾蕙芝）。7月初Rainbow與Lavina帶埋師妹去動畫《冰河世紀3大威龍駕到》首映踩場，即被指打扮暴露刻意搶鏡。
Rainbow：我同佢有代溝
椋名凜五月中以半裸行騷，視宮澤里惠和菅野美穗為偶像的她，希望有一日能像她們成為有名的藝人。
對於椋名凜的一番言論，Rainbow在電話中表現得很不開心，更按奈不住明寸番轉頭，「佢可能唔知依家o靚模係香港新興潮流，佢年紀大，我同佢都隔咗幾個代溝，所以佢唔明我哋做緊乜嘢！」而Lavina亦反擊：「我從來都冇試過唔戴bra行騷，有啲人為咗出位雙手掩胸都得啦！大家有眼睇佢嘅性感Job點都比我多，我都唔想再講。」Lavina明顯暗寸椋名凜早前半裸掩胸行騷。
