憑台灣偶像劇《敗犬女王》由二線尾、三線頭跳升成為一線阿姐嘅楊謹華，因為劇集亦啱啱喺無綫J2 台播緊，連帶香港台劇迷對佢都十分熟識。而楊謹華亦憑住《敗》帶挈榮登新一代廣告女王寶座。
上星期，楊謹華出席代言嘅pizza 記招，話說佢當日身着低胸短裙到場，都唔知有心定無意，當職員將薄餅遞向佢面前時，佢突然彎腰烏身，表演一場「巨波頂薄餅」，搞到在場好多人都好抵死話：未聞餅香先聞奶香。
何謂「敗犬」
媽咪姐好肯定好多人淨係知《敗犬女王》套劇好睇，就唔明咩叫「敗犬」？係咪死狗咁解？No 啦，等媽咪姐話俾大家知咩叫「敗犬」啦！
「敗犬」其實係由日本傳過嚟嘅，係話一啲過咗30 仲未嫁得出嘅「叻叻」女人，呢類女人通常係高學歷、高職位、高收入、及專業人士；雖然對愛情有憧憬，但因自視過高，所以永遠係「愛情失敗者」，就謂之「敗犬」。講真，用「犬」嚟形容又真係幾刻薄喎。
喺《敗犬女王》入面，楊謹華飾演32 歲嘅雜誌老總單無雙；而阮經天則係外表放蕩不覊嘅25 歲打工仔盧卡斯。
楊謹華係咁意露一手已經得大眾咁開心，唔怪得愈撈愈掂啦。
出任pizza 代言人，楊謹華似乎唔多合格，都唔知叫人睇薄餅好，定係要人欣賞佢34D 嘅「波波」。
