過氣緋聞情侶鍾欣桐（阿嬌）同麥浚龍（Juno）噚日前後腳去咗商台接受訪問，喺淫照事件爆發期間，Juno處處表現得護嬌心切，不過傳出兩人分手後，佢哋就表現得好生疏。噚日佢哋嘅訪問時間相隔個半鐘，所以緣慳一面，問到先到場嘅阿嬌會唔會同Juno影合照時，佢即時唱咗幾句：「何必呢！」但又補鑊話影合照冇問題，只係公司唔畀都冇計。
最奇怪喺阿嬌對Juno表現得好生疏，仲拜託記者幫佢同Juno say hi，又話幾個月冇同Juno聯絡，連sms都冇，阿嬌解釋：「朋友唔使keep住日日都sendsms㗎，我太多朋友要掛住啦，好難掛得晒咁多個。」阿嬌又話會主動問Juno會唔會買飛睇佢嘅舞台劇。問到阿嬌係咪同Juno已經分咗手，佢就好緊張咁話：「乜嘢分手呀？」
之後到場嘅Juno就踢爆幾日前先sms畀阿嬌同其他朋友，請大家去睇佢月尾嘅音樂會，兩人擺明冇夾過口供。Juno仲話喺同事口中先知阿嬌喺電台，佢唔介意合照，但提到阿嬌同佢口供唔夾時，佢就反問記者：「你覺得我講大話呀？其實大家唔使太斟酌個時間，溝通呢啲嘢冇話局限幾時嘅。」Juno話時間許可都會買飛捧阿嬌舞台劇場喎。
阿嬌話事前唔知道緋聞男友麥浚龍會現身商台，仲話已經幾個月冇同佢聯絡喎。
一向護嬌心切嘅麥浚龍噚日同阿嬌前後腳到商台接受訪問，緣慳一面。
