徐淑敏樣靚身材正，多人追好平常啫！
Suki 同Jason 前日凌晨去蘭桂坊夜蒲時被本報影到，睇佢哋又幾合襯。
有讀者提供一張Jason 同宋熙年熱戀時嘅親密相。
憑33C 身材獲封為「咪神」嘅徐淑敏（Suki ），前日凌晨俾本報記者發現佢同一個年紀相若嘅四眼男夜蒲蘭桂坊，佢哋表現曖昧，四眼男仲兩度對住Suki 豎起中指，到佢笑得好開心。Suki 同中指男嘅相噚日見報後，有人立即報料踢爆中指男係07 年中華小姐冠軍、無綫藝員宋熙年嘅前男友，報料人仲畀咗一張中指男同宋熙年嘅親密相，相中好似係男方嘅生日，枱前有個蛋糕，宋熙年好似小鳥依人咁攬住中指男條腰。
宋熙年（左）同徐淑敏係好朋友，估唔到連揀男友嘅品味都幾接近。
家境富裕
中指男英文名叫Jason ，家境富裕，屋企喺內地開廣告招牌公司，佢同宋熙年喺澳洲讀大學時認識，拍拖4 年，但好景不常，中指男同宋熙年近日分手，仲同宋嘅老友Suki 一拍即合。對此Suki 噚日喺電話度話：「人哋嘅嘢我唔回應，總之我哋絕對絕對絕對只係普通朋友。」據知Suki 同中指男唔只一次約埋去夜蒲，唔少人都話見過佢哋一齊蒲蘭桂坊。
宋熙年承認Jason 係佢前男友，佢話：「我哋分開咗幾個月，我都有睇報紙，我啲朋友Suki 都識，我哋有一齊食過飯。」唔通Suki 係佢哋嘅第三者？宋熙年話：「唔係，我哋分手唔係因為Suki ，只係我哋嘅方向唔同咗，我哋係讀大學時識，我冇諗過佢哋係咪拍拖，不過我相信唔係囉，佢哋係朋友啫，嗰晚我都有啲朋友喺間夜店度，所以我知乜事，佢只係送Suki 落樓。」
